Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 895 Hüküm no: 1521 Orijinal metin no: [127b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Efendi’nin borçlarını ödemeyip kirada oturduğu evi sahibine teslimi Ma‘rûz Medîne-i Üsküdar’da Gülfam Hatun mahallesi sükkânından Hafız Mehmed Ârif Efendi b. el-Hâc Ömer mahfil-i Bâb’da meclis-i şer‘-i hatîrde Bezzâzistânî Süleyman Efendi b. Ali mahzarında mezbûr Süleyman Efendi mahalle-i mezbûrede vâki‘ menzilde [beher] şehr onar guruş icâre kavliyle müstecirim olup işbu târih-i i‘lâm şehri gāyetinde fesh-i icâre [edip] gurre-i şehr-i âtîde menzil-i mezkûru tahliye ve bana teslîme tenbîh-i şer‘î olunmak murâdımdır icâreden dahi târih-i mezkûra gelince müctemi‘a olan yüz yirmi guruşu taleb ederim deyü ba‘de’d-da‘vâ ve’l-istintâk ve’l-ikrâr alâ mûcibi ikrârihî menzil-i mezkûru gurre-i şehr-i âtîde tahliye ve müdde‘î-i mezbûra teslîme ve meblağ-ı merkūm yüz yirmi guruşu edâya mezbûr Süleyman Efendi’ye ba‘de’t-tenbîh mezbûr Süleyman Efendi menzil-i mezkûru işbu târih-i i‘lâmdan üç gûne değin rızasıyla tahliye ve müdde‘î-i mezbûra teslîme ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 12 min-Ra sene 1207.