Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 896 Hüküm no: 1522 Orijinal metin no: [127b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüllatif b. Mehmed’in amcası Halil Beşe aleyhine açtığı ecr-i misl davasından vazgeçtiği Ma‘rûz Medîne-i Üsküdar’da Büyükhamam’da sâkin Abdüllatif b. Mehmed Zeynel medîne-i mezbûrede mahfil-i Bâb’da meclis-i şer‘-i hatîrde li-eb ammisi Halil Beşe b. Süleyman mahzarında medîne-i mezbûrede Hasanağa mahallesinde vâki‘ ma‘lûmü’l-hudûd ve’l-müştemilât bir bâb vakıf menzil üç sehm i‘tibârıyla bir sehmi benim ve iki sehmi mezbûr Halil Beşe’nin bi’l-icâreteyn tasarrufumuzda olmağla ammim mezbûr Halil Beşe târih-i i‘lâma gelince benim hisse-i mezkûremde fuzûlî altmış üç ay iskân edip lâkin menzil-i mecmû‘-ı mezkûrun ecr-i misli beher şehr üçer guruş olmağla benim sülüs hisse-i mezkûreme isâbet eden beher şehr birer guruşdan mezbûr Halil Beşe zimmetinde müctemi‘ olan altmış üç guruş hakkımı taleb ederim deyü [ecr-i misl] da‘vâsından bâ-tavassut-ı muslihîn meccânen fâriğ olup husûs-ı mezkûra müte‘allika âmme-i de‘âvîden ammisi mezbûr Halil Beşe’nin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 29 min-S sene 1207.