Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 899 Hüküm no: 1528 Orijinal metin no: [128a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nizama aykırı hareketlerinden dolayı Mehmed Salih’in muytabcılık esnaflığından çıkarılmasının istendiği Ma‘rûz Medîne-i Üsküdar’da mûytâb esnâfının kethudâları es-Seyyid İbrahim bin Ali ve yiğitbaşıları Mehmed b. Mustafa ve ustalarından es-Seyyid Osman b. Abdi ve İbrahim b. Hüseyin ve Abdi b. Ali ve es-Seyyid Osman b. Eyüb ve Mehmed b. Ali ve Mehmed b. Mustafa nâm kimesneler medîne-i mezbûrede mahfil-i Bâb’da meclis-i şer‘-i hatîrde yine esnâf-ı mezkûreden Mehmed Salih b. Ali nâm kimesne mahzarında ez-kadîm medîne-i mezbûrede vâki‘ debbâğhânelerde hâsıl olan keçi kılını ashâbından iştirâ ve kethudâ ve ustalar ma‘rifetleriyle tevzî‘ ve taksîm olunmak beynimizde mer‘î ve mu‘teber nizâm-ı kadîmimizden iken bu esnâda mezbûr Mehmed Salih muhill-i nizâm medîne-i mezbûre debbâğhânelerinden keçi kılını ashâbından ziyâde bahâ ile hufyeten iştirâ ve ol-vechile nizâm-ı kadîmimizin ihtilâline bâdî olur deyü herbiri muvâcehelerinde teşekkî ve fîmâ-ba‘d mezbûr Mehmed Salih san‘at-ı mezkûreden tard ve ihrâc olunmak bâbında fermân-ı âlîleri sudûrunu esnâf-ı mezkûreden herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 18 min-Ra sene 1207.