Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 898 Hüküm no: 1527 Orijinal metin no: [128a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hamza’nın haksız yere Viranşehir voyvodası tarafından parasının alınmasına sebep olduğu iddiasıyla Ahmed b. Mehmed aleyhine açtığı davada iddiasını ispat edemediği Ma‘rûz Vilâyet-i Anadolu’da Zağferanborlu kazâsı ahâlisinden olup hâlâ mahmiye-i İslâmbol’da Cebehâne Ocağı’nın yirmi beşinci bölüğü neferâtının kışlasında misâfiren sâkin Mustafa b. Hamza medîne-i Üsküdar’da mahfil-i Bâb’da meclis-i şer‘-i hatîrde Ahmed b. Mehmed muvâcehesinde ben mezbûr Ahmed ile mârrü’z-zikr Zağferanborlu kazâsında sâkinler iken târih-i i‘lâmdan iki ay mukaddem zaleme ve ehl-i örf tâifesinden Viranşehir Voyvodası Çalıkoğlu nâm kimesneye bi-gayrı hakkın babasından yirmi sekiz guruş alacak hakkım vardır deyü gamz edip ol dahi beni habsedip babam mezbûrun deyni olan meblağ-ı merkūm yirmi sekiz guruşu mezbûr Ahmed’e rızâm ile edâ eylediğimden mâ‘adâ zulmen yirmi guruşumu dahi aldırmağa sebeb ve ol-vechile tağrîm etmekle meblağ-ı merkūm yirmi guruş mezbûr Ahmed’den tazmîn olunmak matlûbumdur deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyândan izhâr-ı acz edip talebiyle mezbûr Ahmed gıbbe’t-tahlîfi’ş-şer‘î mûcibiyle müdde‘î-i mezbûr Mustafa da‘vâ-yı mezkûresiyle mezbûr Ahmed’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 16 min-Ra sene 1207.