Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 903 Hüküm no: 1539 Orijinal metin no: [129a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı İbrahim Beşe’nin kendisini tartakladığı iddiasıyla Dellak Zeynelabidin aleyhine açtığı davada iddiasını ispat edemediği Ma‘rûz Medîne-i Üsküdar’da Doğancılar kurbünde sâkin Arabacı İbrahim Beşe b. Ali meclis-i şer‘-i hatîrde medîne-i mezbûrede vâki‘ Hacıpaşa Hamamı’nda sâkin Dellâk Zeynelabidin b. Mehmed mahzarında târih-i i‘lâmdan üç gün mukaddem ba‘de’z-zuhr mezbûr Zeynelabidin hamam-ı mezkûr derûnunda beni bi-gayrı hakkın amden taşra çık deyü sağ elimden çekip ve sağ geğreğim üzerine taşa ilkā eylediğinden nâşi zikr olunan geğrek kemiğe veca‘ hâsıl ve hareket eylediğimde usreti olmağla mûcib-i şer‘îsini taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını isbâta kādir olamayıp mezbûr Zeynelabidin gıbbe’t-tahlîfi’ş-şer‘î mûcibiyle müdde‘î-i mezbûr husûs-ı mezkûrda mezbûr Zeynelabidin’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 15 min-Ra sene 1207.