Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 904 Hüküm no: 1541 Orijinal metin no: [129a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbtiye Saliha’nın alacaklısına borcunu zamanında ödeyemediği için kendisini boşayan kocası Kıbti Hasan’dan mehir alacağı olduğu Ma‘rûz Medîne-i Üsküdar’da Solaksinan mahallesinde sâkine ve zatı mu‘arrefe Saliha bt. Mehmed nâm Kıbtiye mahfil-i Bâb’da meclis-i şer‘-i hatîrde zevci Hasan b. Derviş nâm Kıbtî mahzarında mezbûr Hasan elli guruş mehr-i müeccel tesmiyesiyle zevcim olup târih-i i‘lâmdan üç ay mukaddem zevcim mezbûr Hasan’ın gāib ani’l-meclis ismi ma‘lûmum olmayan bir kimesneye on dört guruş deyni olup eğer meblağ-ı merkūm on dört guruşu yirmi güne dek edâ etmez isem benden boş ol deyü şart ve ta‘lîk edip yirmi gün mürûrunda meblağ-ı merkūmu edâ etmeyip ben mezbûrdan şart-ı mezkûrun vukū‘u ve iddetim münkaziye olduğuna binâen mutallaka olmamla mehr-i mezkûrum olan elli guruşu taleb ederim deyü ba‘de’d-da‘vâ ve’l-ikrâr mûcibiyle meblağ-ı merkūm elli guruşun edâsıyla mezbûr Hasan ilzâm olunduğu bi’l-iltimâs huzûr-ı âlîlerine i‘lâm olundu. Fî 26 min-Safer sene 1207.