Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 910 Hüküm no: 1553 Orijinal metin no: [130a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hüseyin Beşe’nin sattığı karasığır öküzü bedelinden alacağını ödemesi için Seyyid Mehmed Sadık’a altı ay süre verdiği Ma‘rûz Medîne-i Üsküdar’da tâbi‘ Bulgurlu karyesinde sâkin es-Seyyid Hüseyin Beşe b. Hüseyin nâm kimesne medîne-i mezbûrede mahfil-i Bâb’da meclis-i şer‘-i hatîrde es-Seyyid Mehmed Sadık b. Ömer mahzarında mezbûr es-Seyyid Mehmed Sadık târih-i i‘lâmdan bir buçuk sene mukaddem yedimden iştirâ ve kabz eylediği bir çift karasığır öküzü semeninden yüz yetmiş guruş hakkımın altmış beş guruşunu yedinden ahz ü kabz ve bâkī yüz beş guruşu zimmetinde kalmağla taleb ederim deyü da‘vâ ve mezbûr es-Seyyid Mehmed Sadık cevâbında fi’l-hakīka müdde‘î-i mezbûra cihet-i mezkûreden yüz beş guruş bâkī deyni olduğunu ikrâr lâkin müdde‘î-i mezbûr kabzını mu‘terif olduğu altmış beş guruşdan mâ‘adâ on beş guruş dahi def‘ ve teslîm edip hâlâ zimmetimde doksan guruş deynim kalmışdır deyü eylediği ziyâde def‘ini Mehmed b. Süleyman ve Süleyman b. Hüseyin nâm kimesneler şehâdetleriyle isbât etmeğin mûcibiyle müdde‘î-i merkūm ziyâde on beş guruş müdde‘âsıyla mu‘ârazadan ba‘de’l-men‘ mezbûr es-Seyyid Mehmed Sadık mukırr u mu‘terif olduğu meblağ-ı merkūm doksan guruşu hâlen edâya iktidârı olmayıp tecîle tâlib olmağın müdde‘î-i mezbûr dahi târih-i i‘lâmdan altı ay tamamında meblağ-ı bâkī-i merkūm doksan guruşu kendiye edâ etmek üzere mezbûr es-Seyyid Mehmed Sadık’ı bi’r-rızâ tecîl eyledikde ol dahi ber-vech-i muharrer müeccelen edâ etmek üzere ta‘ahhüd ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 7 min-Ra sene 1207.