Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 912 Hüküm no: 1557 Orijinal metin no: [130b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. İbrahim’in tahsil ettiği alacağını kendisine teslim ettiğini ispat eden Kürt İbrahim’e borcu olduğu Ma‘rûz Medîne-i Üsküdar’da Vâlide-i Atik mahallesi sâkinlerinden derûn-ı arzuhâlde ismi mezkûr Hüseyin b. İbrahim nâm kimesne medîne-i mezbûrede mahfil-i Bâb’da meclis-i şer‘-i hatîrde sâhib-i arzuhâl Kürd İbrahim b. Yakub nâm kimesne mahzarında gāib ani’l-meclis Artin nâm zimmî zimmetinde yetmiş guruş alacak hakkım olup târih-i i‘lâmdan üç sene mukaddem gāib-i merkūmu Ağakapısı’na habsetdirdiğimde mezbûr İbrahim benim için emriyle meblağ-ı merkūm yetmiş guruşu gāib-i merkūmdan ahz ve yedi guruş resmini ba‘de’l-ihrâc altmış üç guruşu bana teslîm etmeyip hâlâ zimmetinde kalmağla taleb ederim deyü da‘vâ ol dahi cevâbında meblağ-ı merkūm altmış üç guruşu kabzını ikrâr lâkin kendiye tamamen def‘ ü teslîm etmişdim deyü eylediği def‘ini isbât için zikri âtî şâhidlere zafer bulamayıp ba‘de’l-istimhâl ve’l-imhâl tahlîfe dahi tâlib olmamağla alâ mûcibi ikrârihî meblağ-ı merkūm altmış üç guruşu mezbûr Hüseyin’e târih-i i‘lâm sene[si] Safer’inin selhinde tamamen edâ ve teslîm eyledikden sonra mezbûr İbrahim on beş gün mukaddem ber-vech-i muharrer eylediği def‘ini lede’t-tezkiye adâletleri zâhir olan Mehmed Ağa b. Mahmud ve Ömer Beşe b. Yusuf nâm kimesneler şehâdetleriyle ber-nehc-i şer‘î mezbûr Hüseyin muvâcehesinde isbât etmeğin mûcibiyle meblağ-ı merkūm altmış üç guruşu mezbûr İbrahim’e redd ü teslîme mezbûr Hüseyin’e şer‘an tenbîh olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 15 min-Ra sene 1207.