Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 916 Hüküm no: 1565 Orijinal metin no: [131b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Molla Halil’in kiracı olarak bulunduğu Seyyid Numan Ağa’ya ait sarraç dükkânı hissesini ay sonuna kadar boşaltmaya söz verdiği Ma‘rûz Medîne-i Üsküdar’da Selmanağa mahallesinde sâkin es-Seyyid Numan Ağa b. el-Hâc Abdülgani medîne-i mezbûrede mahfil-i Bâb’da meclis-i şer‘-i hatîrde es-Seyyid Molla Halil b. es-Seyyid Hüseyin mahzarında medîne-i mezbûrede Davudpaşa mahallesinde vâki‘ ma‘lûm birbirine muttasıl iki kıt‘a vakıf sarrâc dükkânları dört sehm i‘tibârıyla üç sehmi benim ve bir sehmi mezbûr es-Seyyid Molla Halil’in bi’l-icâreteyn tasarrufumuzda olup zikr olunan dükkânların birinde müstakıllen ben sâkin olup ve birinde dahi kezâlik mezbûr es-Seyyid Molla Halil sâkin olup benim hissem mezbûr es-Seyyid Molla Halil’in hissesinden ezyed olan hissemi beher şehr kırkar para ücret ile mezbûr es-Seyyid Molla Halil’e îcâr ve hâlâ fesh-i akd-i îcâr etmemle sâkin olduğu dükkân-ı mezkûrda hissemden gāyet-i şehr-i âtîde keff-i yed etmesi matlûbumdur deyü da‘vâ ve mezbûr es-Seyyid Halil cevâbında ber-vech-i muharrer müdde‘î-i mezbûrun takrîrini tasdîk ve dükkân-ı mezkûru gāyet-i şehr-i âtîde keff-i yedine mezbûr es-Seyyid Molla Halil’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 4 min-Ra sene 1207.