Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 919 Hüküm no: 1571 Orijinal metin no: [132a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Öldürülen Mehmed Emin’in katilleri oldukları iddiasıyla vârisleri tarafından Asvador, Mıgırdıç ve Artin aleyhine açılan cinayet davasında davacıların iddialarını ispat edemedikleri Ma‘rûz Medîne-i Üsküdar’da Vâlide-i Atik Dârüşşififâsı’nda sâkin iken işbu târih-i i‘lâm senesi cerîhan fevt olup lede’l-keşf ve’l-mu‘âyene zâhir olan Mehmed Emin b. Mehmed nâm mecnûnun hasren vârisleri olan li-ebeveyn kız karındaşları Nefîse bt. Mehmed ve Âişe bt. Mehmed nâm hatunlar taraflarından vekîlleri olduğu ber-nehc-i şer‘î sâbit olan mu‘arrefetü’z-zât Tevhide bt. Ali nâm hatun ile li-üm er karındaşı Mustafa b. Hasan nâm kimesneden herbiri vekâleten ve asâleten medîne-i mezbûre Bâb Mahkemesi’nde meclis-i şer‘de yine medîne-i merkūmede Yenimahalle mütemekkinlerinden Asvador v. Agop ve Mıgırdıç v. Agop ve Artin v. Arsam nâm zimmîler muvâcehelerinde bundan akdem cerîhan vefât eden karındaşımız Mehmed Emin’in verâseti bizlere münhasıra olup karındaşımız mezbûrun kātilleri işbu merkūmûn Asvador ve Mıgırdıç ve Artin ve isimleri ma‘lûmumuz olmayan gāib ani’l-meclis aveneler olmağla mûcib-i şer‘îsini taleb ederiz deyü tasaddî [eyledikleri] da‘vâlarında târih-i i‘lâmdan on gün mukaddem karındaşımız mecnûn-ı mezbûr Mehmed Emin mahalle-i mezbûrede geşt ü güzâr ve mersûmûnun menziline vürûdunda mecnûn-ı merkūmu mesfûrûn ahz ve darb-ı şedîd ile darb eylediklerinden nâşi elini ve gözleri ve başı üzeri ve kolları kara bere olduğundan mâ‘adâ isimleri ma‘lûmum olmayan aveneleri batnı üzerinden bıçak ile beş yerinden amden darb ve cerh eyleyip karındaşımız mecnûn-ı mezbûr Mehmed Emin üç gün mürûrunda darb ve cerh-i mezbûrdan müte’essiren fevt olmağla mûcib-i şer‘îsini taleb ederim deyü ba‘de’d-da‘vâ ve’l-istintâk mersûmun dahi bi’l-külliye inkârlarından sonra müdde‘î-i mezbûrlar Tevhide Hatun ve Mustafa ber-vech-i muharrer müdde‘âlarını isbât için birkaç def‘a ba‘de’l-istimhâl ve’l-imhâl her def‘ada ityân-ı beyyineden izhâr-ı acz edip tahlîfe dahi tâlib olmamalarına bilâ-beyyine-i âdile mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 25 min-Ra sene 1207.