Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 919 Hüküm no: 1570 Orijinal metin no: [131b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Anton’un öldürülen İspaso’ya borcunun olmadığını vârisleri huzurunda şahitlerle ispat ettiği Ma‘rûz Medîne-i Üsküdar’da Selami mahallesinde vâki‘ Bakkāl Anton zimmî dükkânında mütemekkin iken bundan akdem katîlen hâlik olan İspaso v. Dimo zimmînin li-ebeveyn ammi ve usûbet-i nesebiyye cihetinden hasren vârisi olan Angeli v. İstefan nâm zimmî medîne-i mezbûrede mahfil-i Bâb’da meclis-i şer‘-i hatîrde Bakkāl Anton v. Yorgi nâm zimmî muvâcehesinde hâlik-i merkūm İspaso zimmî kesim ta‘bîr olunur kırk altı guruş ücret kavliyle merkūm Anton zimmînin dükkânında bir sene hizmet ve kable’l-ahz ve’l-istifâ hâlik olup terekesinden olmağla bi’l-verâse taleb ederim deyü da‘vâ ve merkūm Anton zimmî cevâbında hâlik-i merkūm ol-mikdâr ücret kavliyle hizmet eylediğini ikrâr lâkin hayatında yedine def‘ ve teslîm etmemle zimmetim berî’e olmuşdu deyü ba‘de’d-def‘ ve’l-inkâr merkūm Anton zimmî ber-vech-i muharrer eylediği def‘ini udûlden Yorgi v. Panayot ve Hıristo v. Dimitri nâm zimmîler şehâdetleriyle vech-i şer‘î üzere muvâcehesinde isbât etmeğin mûcibiyle merkūm Angeli zimmî husûs-ı merkūmda merkūm Anton zimmîye bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 9 min-Ra sene 1207.