Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 926 Hüküm no: 1582 Orijinal metin no: [133a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed b. İbrahim’in evinde kalan kız kardeşi Hanife’yi dövmemek ve nafakasını temin etmek kaydıyla kocasına teslim etmeye söz verdiği Ma‘rûz Medîne-i Üsküdar’da Kefçe mahallesinde sâkin Ali b. el-Hâc Ahmed mahfil-i Bâb’da meclis-i şer‘-i hatîrde kayını el-Hâc Ahmed b. İbrahim mahzarında mezbûr el-Hâc Ahmed zevcem gāibe ani’l-meclis Hanife Hatun’u üç aydan beri kendi menzilinde iskân etmekle bana teslîme tenbîh olunmak murâdımdır deyü da‘vâ ve mezbûr el-Hâc Ahmed cevâbında müdde‘î-i mezbûrun zevcesini menzilinde iskânını ikrâr lâkin müdde‘î-i mezbûr zevcesi mezbûre Hanife’yi darb ol dahi benim menzilimde sâkine olmuşdu deyü beynlerinde ba‘de vukū‘i’l-münâza‘a müdde‘î-i mezbûr zevcesi mezbûre Hanife’yi darb etmeyip meûnetini görmeğe ve hîn-i mutâlebede huzûr-ı şer‘a ihzâra Hayreddin Çavuş mahallesi sükkânından hâzır bi’l-meclis Duhânî es-Seyyid İbrahim b. Mehmed nâm kimesne tekeffül ve mezbûr el-Hâc Ahmed dahi zevcesi mezbûre Hanife Hatun’u teslîme ta‘ahhüd ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 15 min-R sene 1207.