Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 925 Hüküm no: 1581 Orijinal metin no: [133a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Abdullah’ın yanındaki küçük kızı Emine’in birikmiş nafaka bedelinden eski kocasından alacağı olduğu Ma‘rûz Mahmiye-i İslâmbol’da Kocamustafapaşa kurbünde Canbaziye mahallesinde sâkine mu‘arrefetü’z-zât Fatıma bt. Abdullah nâm hatun medîne-i Üsküdar’da mahfil-i Bâb’da meclis-i şer‘-i hatîrde zevc-i sâbıkı es-Seyyid Osman b. Salih mahzarında zevcim mezbûrun firâşından hâsıla ve benden mütevellide olup bi-hakkı’l-hıdâne hâlâ hacr ve terbiyemde olan kızım sagīre Emine’nin bâ-hüccet târih-i i‘lâma gelince dört buçuk ayda beher şehr yüz ellişer para nafaka-i mefrûza-i müstedânesinden zimmetinde müctemi‘a olan cem‘an on yedi guruşu taleb ederim deyü da‘vâ ve mezbûr es-Seyyid Osman cevâbında meblağ-ı merkūmu ikrâr lâkin sagīre-i mezbûrenin hıdânesi sâkıt olmağla kızım sagīre-i mezbûreyi bana teslîme tenbîh olunması matlûbumdur deyü da‘vâ ve beynlerinde ba‘de vukū‘i’l-münâza‘a bâ-tavassut-ı muslihîn mezbûr es-Seyyid Osman mukırr u mu‘terif olduğu meblağ-ı merkūm on yedi guruşu müdde‘iye-i mezbûreye def‘ ü teslîm ve sagīre-i mezbûreyi mezbûre vâlidesi yanında terk ve müdde‘iye-i mezbûre dahi kızı sagīre-i mezbûrenin nafaka-i âtîyesinden fâriğa ve bi’r-rızâ kendi mâlından teberru‘an infâk ve iksâ eylemek üzere kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 11 min-R sene 1207.