Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 473 Hüküm no: 540 Orijinal metin no: [113a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tevkii Cafer Mahallesi ahalisi ile Sinan v. Karagoç’un yaptığı menzil hususundaki davada sulh oldukları Ma‘rûz. Sâdır olan fermân-ı âlîlerine imtisâlen kıbel-i şer‘den irsâl olunan keşif nâibi Abdurrahman Efendi dâ‘îleri hâssa mi‘mârlarından el-Hâc Mustafa b. Ali nâm halîfe ile İstanbul’da Tevkī‘î Ca‘fer Mahallesi’nde vâki‘ el-Hâc Ömer nâm sâhibü’l-hayrın müsakkafâtının tarîk-i hâssı olan sed üzerine varıp ba‘de akdi’l-meclis ol tarîk-i hâs ahâlîsi olan ashâb-ı arzuhâl ol seddin esfelinde vâki‘ Zülfikār Ağa Vakfı’ndan muhterik menzil arsasına mutasarrıf olan Sinan v. Karagoç nâm zimmî muvâcehesinde vakf-ı evvelin kāimmakām-ı mütevellîsi Ali Efendi b. el-Hâc İsmail ile vakf-ı sânî mütevellîsi Hüseyin Ağa b. Hasan Ağa hâzırân oldukları hâlde mesfûr Sinan Kalfa’nın menzilinin tarîk-i hass-ı âhara kapısı olup bizim tarîk-i hâssımız olan sed üzerine kadîmden kapısı olmayıp kable’l-harîk bir tarîk ile kapı ihdâs etmeğin hâlâ yine bizim iznimizsiz kapı açmak murâd eder ve ol tarîk-i hâssın seddinden tûlen on zirâ‘ ve on parmak ve arzen taraf-ı a‘lâsı nıfs zirâ‘ ve taraf-ı esfeli bir buçuk zirâ‘ mahalline akīb-i harîkde hedm ve gasben kendi tasarrufunda olan arsaya zam ve ilhâk ve üzerine hâlâ binâya mübâşeret edip ve tarîk-i hass-ı mezbûra şehnişîn çıkıp ve pencereler mevzi‘leri alıko[yu]p ve binâsını dokuz zirâ‘dan ziyâde mugāyir-i fermân-ı âlî direkler nasbedip ifrât üzere terfî‘ eyledi deyü ahâlî da‘vâya tasaddî eylediklerinde muslihûn tavassutuyla mezbûrûn ol sed duvarından mikdâr-ı merkūmu gasb da‘vâsından ferağ ve ol sedde vehn târî olmağın kendi mâllarıyla müstahkem horasan ve kireç ile binâ ve mezbûr Sinan dahi ol sed üzerine kapı açmakdan ferağ ve çıktığı şehnişîni kat‘ ve câr-ı muttasılı Usta Margos nâm zimmînin binâsının irtifâ‘ı mikdârından ziyâdesini tenzîl ve ol tarîk-i hâssa kat‘â pencere açmamak üzere ta‘ahhüd ve bu vech üzere terâzîlerini mezkûr dâ‘îleri mahallinde ketb ve imlâ ba‘dehû ma‘an ba‘s olunan ümenâ-i şer‘le bu dâ‘îlerine inhâ eylediği huzûr-ı âlîlerine i‘lâm olundu. Bâkī fermân hazret-i veliyyü’l-emrindir. Fî 24 Rebî‘ülâhir sene [1]143.