Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 474 Hüküm no: 541 Orijinal metin no: [113a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çatkı bürünceği dokuyan esnaftan usûle aykırı vergi alınmaması Ma‘rûz. Ashâb-ı arzuhâl çatkı bürünceği dokuyan hırfetinin kethüdâları İbrahim ve yiğitbaşıları Mehmed ve sâir üstâdlarından müseccelü’l-esâmî on altı nefer kimesneler meclis-i şer‘de hâlâ tamga-yı akmişe mukāta‘ası emîni vekîli olan el-Hâc Ahmed Ağa muvâcehesinde kadîmü’l-eyyâmdan metâ‘larımızdan resm nâmıyla bir akçe ve bir habbe alınageldiği yoğiken birkaç zamândan berü bizden bi-gayr-ı hakkın beher mâh üç bin beş yüz akçe aldığı resm, muhdes ve ref‘i lâzım mezâlimden olmağla bundan adem zulm-i mezbûr üzerimizden ref‘ ve yedimize emr-i âlîşân verilmişiken vekîl-i mezbûr itâ‘at etmeyip yine bizi ke’l-evvel mütâlebe murâd eder deyü mazmûnu takrîr-i meşrûhlarına mutâbık tuğra-yı garrâ-yı sultânî ile muhallâ bir kıt‘a emr-i âlî ibrâz ettiklerinde ba‘de’l-feth ve’l-kırâe mazmûn-ı itâ‘at-makrûnu üzere ba‘de’l-yevm hilâf-ı şer‘-i şerîf ve mugāyir-i emr-i münîf mezbûrlardan resm talebiyle rencîde etmemek üzere vekîl-i mezbûra tenbîh olunduğu huzûr-ı âlîlerine i‘lâm olundu. Bâkī fermân men-lehü’l-emrindir. Fî 27 Rebî‘ülâhir sene 1143.