Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 952 Hüküm no: 1632 Orijinal metin no: [137b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. İbrahim’in evine gizlice hırsızlık yapmak için girdiği iddiasıyla Mehmed b. Hasan aleyhine açtığı davadan vazgeçtiği Ma‘rûz Medîne-i Üsküdar’da Kefçe mahallesinde sâkine Hadice bt. İbrahim nâm hatun tarafından ber-vech-i âtî vekîl olduğu zâtını ârifân es-Seyyid Mustafa Ağa b. Hasan ve Memiş Çelebi b. Mustafa nâm kimesneler şehâdetleriyle sâbit olan İmâm Osman Efendi b. İbrahim mahfil-i Bâb’da meclis-i şer‘-i hatîrde Mehmed b. Hasan tarafından ber-vech-i âtî tasdîka vekîl olan Ali Beşe b. Ömer mahzarında mezbûr Mehmed’in menzili müvekkilem mezbûrenin menzili ittisâlinde olup mezbûr Mehmed’in pilici menzilinden hurûc ve müvekkilem mezbûrenin menziline duhûl edip mezbûr Mehmed pilicini ahz etmek için müvekkilem mezbûrenin menziline hufyeten duhûl etmekle müvekkilem mezbûre dahi mezbûr Mehmed’i serika töhmetiyle ithâm murâd edip ol-vechile da‘vâya mübâşeret etmişdi el-hâletü hâzihî mezbûr Mehmed’in sun‘u olmayıp fi’l-hakīka piliç teftîşi olup tasaddî eylediği da‘vâsından bâ-tavassut-ı muslihîn meccânen fâriğ olup husûs-ı mezkûra müte‘allika âmme-i de‘âvîden mezbûr Mehmed’in zimmetini bi’l-vekâle ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî-selhi Muharrem sene 1207.