Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 954 Hüküm no: 1638 Orijinal metin no: [138a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamal Hüseyin’in borç verdiği Hamal Mustafa’dan alacağı olduğu Ma‘rûz Medîne-i Üsküdar’da Büyük İskele’de sâkin Hammâl Hüseyin b. Ömer nâm kimesne medîne-i mezbûrede mahfil-i Bâb’da meclis-i şer‘-i hatîrde Hammâl Mustafa b. Hasan mahzarında mezbûr Mustafa târih-i i‘lâmdan bir sene mukaddem bâ-temessük yedimden istidâne ve kabz eylediği otuz guruş ve bilâ-devr ribâ olmak üzere yirmi iki guruş ki cem‘an elli iki guruşu taleb ederim deyü takrîri üzere bilâ-devr ribâ da‘vâsı mesmû‘a olmayıp mezbûr Mustafa bî-vech mu‘ârazadan ba‘de’l-men‘ ziyâde müdde‘âsı meblağ-ı merkūm otuz guruşu mezbûr Mustafa ikrâr ü i‘tirâf edip lâkin meblağ-ı merkūm otuz guruşun dahi yirmi guruşunu bi’d-defa‘ât kendiye edâ ve teslîm edip ancak on guruşu zimmetimde deynim bâkī kalmışdı deyü ba‘de’d-da‘vâ ve’l-inkâr mezbûr Mustafa def‘-i mezkûrunu beyândan izhâr-ı acz birle bi’t-taleb müdde‘î-i mezbûr gıbbe’t-tahlîfi’ş-şer‘î mûcibiyle meblağ-ı merkūm otuz guruşu müdde‘î-i mezbûra edâ ve teslîme mezbûr Mustafa’ya şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 27 min-Z sene 1206.