Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 475 Hüküm no: 543 Orijinal metin no: [113b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçı ve şerbetçi esnafının önceki kethüdaları es-Seyyid Mustafa’nın esnafın işlerine karışmayacağını taahhüt ettiği Ma‘rûz. Ashâb-ı arzuhâl aşçı ve şerbetçi hırfetinin bâ-berât-ı âlîşân kethüdâları olan es-Seyyid el-Hâc Mehmed ve hırfet-i mezkûre erbâbından Molla Ali ve Yusuf ve Yiğitbaşı İbrahim ve es-Seyyid el-Hâc Mustafa ve Ahmed Çelebi ve Hüseyin Beşe ve Osman Beşe ve Hüseyin Beşe ve Ali Beşe ve Mehmed Beşe ve sâir cemm-i gafîr meclis-i şer‘de derûn-ı arzuhâlde mezkûr es-Seyyid Mustafa mahzarında mezbûr es-Seyyid Mustafa sâbıkā kethüdâmız olup bundan akdem ber-mûceb-i i‘lâm kendiden teşekkî eylediğimize binâen azl ve ihrâc olunmuş iken kanâ‘at etmeyip senedâtı yedinde bâkī kaldığı ecilden zikrolunan kethüdâlığa ve sâir beynimizde olan umûrumuza bî-vech müdâhale etmekle her birimizi rencîde ve beynimizde ihtilâle bâ‘is olmağın mezbûrdan emîn ve hoşnûd değilleriz deyü teşekkî etmeleriyle min-ba‘d zikrolunan kethüdâlık ve sâir umûrlarına müdâhale ve mezbûrûnu rencîde ve ta‘cîz etmemek üzere mezbûr es-Seyyid Mustafa’ya ba‘de’t-tenbîh mezbûr es-Seyyid Mustafa dahi ber-vech-i muharrer ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 27 Rebî‘ülâhir sene [1]143.