Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 477 Hüküm no: 548 Orijinal metin no: [113b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc İbrahim’in inşa ettiği binanın usûlüne uygun olduğundan engel olunmaması Ma‘rûz. Sâdır olan fermân-ı âlîlerine imtisâlen kıbel-i şer‘den irsâl olunan keşif nâibi Abdurrahman Efendi hâssa mi‘mârlarından Hüseyin b. Ömer ile İstanbul’da Sultan Selim Câmi‘-i şerîfi kurbünde Cebecibaşı Mahallesi’nde tarîk-i hâsda vâki‘ Kaya Hatun Vakfı’ndan sâhib-i arzuhâl el-Hâc İbrahim b. el-Hâc Ahmed’in bi’l-icâreteyn tasarruflarında olan muhterik menzil arsası üzerine varıp ba‘de akdi’l-meclis ol tarîk-i hâs erbâbından olup arsa-yı merkūme mukābilinde menzilleri olan Yunus Efendi ve Mustafa Çelebi ve Çıkrıkçı Hasan Çelebi ve Türkmenoğlu Mustafa ve Canbaz el-Hâc Mustafa b. el-Hâc Ahmed nâm kimesneler mezbûr İbrahim muvâcehesinde vakf-ı mezbûr mütevellîsi Abdülhalim Çelebi hâzır olduğu hâlde işbu arsanın kable’l-harîk binâsı şark ve şimâl tarafında olup menzillerimiz mukābelesinde olan garb ve cenûb tarafı binâdan hâlî menzil havlusu iken hâlâ mezbûr el-Hâc İbrahim havlu mahalline binâya şürû‘ etmekle menzillerimizin ziyâde muzlim olmasına bâ‘is olmağın râzı olmazız dediklerinde mezbûr el-Hâc İbrahim cevâbında eğer ol mahalle binâ etmesem mezbûrûnun menzillerinden benim makarr-ı nisvân olan mevâzi‘me indifâ‘ı asîr havâleler hudûs etmekle binâyı minvâl-ı muharrer üzere tahvîle muztar oldum tarîk-i hâssa şehnişîn çıkmayıp ve pencere vaz‘ etmeyip binâ ederim dedikde mi‘mâr-ı mezbûr fi’l-hakīka merkūm el-Hâc İbrahim ol mahalle ber-vech-i muharrer iki kat binâ ve irtifâ‘ını câr-ı mülâsıkı bakkal dükkânı üzerinin yedi buçuk zirâ‘ kaddi mikdârı ettikde mezbûrûnun ziyâlarına fennim muktezâsınca kat‘â mümâna‘atı yokdur deyü haber vermeğin mezbûr el-Hâc İbrahim’in bilâ-zarâr-ı şer‘î binâsına mümâna‘at etmemek üzere mezbûrûna tenbîh eylediğini mezkûr dâ‘îleri mahallinde tahrîr ba‘dehû ma‘an ba‘s olunan ümenâ-i şer‘le bu dâ‘îlerine inhâ eylediği huzûr-ı âlîlerine i‘lâm olundu. Bâkī emr hazret-i veliyyü’l-emrindir. Fî 15 R sene 1143.