Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 480 Hüküm no: 556 Orijinal metin no: [114b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman ile Yusuf Çelebi ve Osman Çelebi’nin sulh oldukları Ma‘rûz. Sâhib-i arzuhâl Osman derûn-ı arzuhâlde mezkûr Yusuf Çelebi ve gāib ani’l-meclis Osman Çelebi târih-i i‘lâmdan dört sene mukaddem Ahmed Efendi nâm kimesnenin hizmetinde iken mezbûrân Yusuf ve Osman [-iki yüz] otuz guruş kıymetli bir re’s gulâmımı yüz seksen guruşa cebren ahz u kabz ve benim başıma darb-ı şedîd ile darb etmeleriyle ol darbdan nâşî sol gözüm a‘mâ olmuş idi deyü tasaddî eylediği da‘vâsından seksen guruş bedel-i makbûza mezbûrân Yusuf ve gāib ani’l-meclis Osman ile sulh olup husûs-ı mezkûra müte‘allika âmme-i da‘vâdan mezbûrânın ve efendileri Ahmed Efendi’nin zimmetlerini ibrâ-i âm ile ibrâ ve iskāt eylediği ba‘de’t-tescîl mübâşirleri Ömer Ağa iltimâsıyla huzûr-ı âlîlerine i‘lâm olundu. Fermân men-lehü’l-emrindir. Fî 3 Cumâdelûlâ sene [1]143.