Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 479 Hüküm no: 555 Orijinal metin no: [114a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Nasuh’un babasından intikal eden çörekçi dükkanı edevatını babasının ortağı Şaban’a kiraya verdiği Ma‘rûz. Sâhib-i arzuhâl Mehmed b. Nasuh nâm kimesne meclis-i şer‘de çörekçi tâifesinden Ali Beşe b. Ahmed nâm kimesne mahzarında İstanbul’da Ebu’l-feth Sultan Mehmed Hân -aleyhi’l-mağfiretü ve’r-rıdvân- Câmi‘-i şerîfi kurbünde Karaman-ı kebîr sûkunda vâki‘ çörekçi fırını derûnunda mevcûd yüz dört vakıyye evânî-i nuhâsiyye ve iki vakıyye takım ile dört aded terâzû ve bir balta ve iki teneke iki destgâh ve iki merdâne ve iki el satırı ve bir soğan satırı ve iki kürek ve iki kanca ve bir sagīr piştahtanın nısf-ı şâyi‘i Şa‘ban nâm kimesnenin ve nısf-ı şâyi‘-i âharı pederim müteveffâ Nasuh’un ile’l-vefât mülk ve hakkı olmağla ba‘de’l-vefâtihi nısf hisse-i mezkûre bi’l-irsi’ş-şer‘î bana intikāl etmekle işbu bin yüz kırk üç senesi Cumâdelûlâ’sı gurresinden beher şehr dörder guruşa [114b] mezbûr Ali Beşe’ye îcâr ve teslîm ol dahi ber-vech-i muharrer istîcâr ve kabûl edip zabti’çün yedine işbu memhûr temessüğü i‘tâ eyledim deyü ikrârı tescîl olunmağın huzûr-ı âlîlerine i‘lâm olundu. Fî 3 Cumâdelûlâ sene [1]143.