Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 481 Hüküm no: 558 Orijinal metin no: [114b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Teberdar Süleyman Bey’in es-Seyyid Ahmed Efendi üzerine açtığı davanın geçerli olmadığı Ma‘rûz. Teberdâr Süleyman Bey nâm kimesne nâkībü’l-eşrâf çavuşlarından Mustafa Çavuş mübâşeretiyle Mahkeme-i Bâb’a ihzâr ettirdiği es-Seyyid Ahmed Efendi mahzarında târih-i i‘lâmdan iki sene mukaddem vilâyet-i Anadolu’da Çay kazâsında nâibü’ş-şer‘ olup ben dahi voyvoda olmamla mezbûr es-Seyyid Ahmed Efendi kazâ-i mezbûrdan ba‘de’l-azl Kütahya vâlîsine hitâben fermân-ı âlî ısdâr ve benden teşekkî etmekle vâlî-i mûmâ-ileyh dahi buyruldu ile ta‘yîn eylediği mübâşirhânemi basıp mecmû‘u dört yüz otuz guruş kıymetli bir re’s at ve bir sim kılıç ve bir sim gaddâre ve bir çuka biniş ve bir boylu tüfenk ve nakd yüz guruşumu gāret edip işbu mezbûr es-Seyyid Ahmed Efendi sebeb olmağla eşyâ-i mezkûrenin kıymetleri ile meblağ-ı mezbûru mezbûr es-Seyyid Ahmed Efendi’den taleb ederim deyü tasaddî eylediği da‘vâsı sahîh olmayıp ve mezbûr es-Seyyid Ahmed Efendi’ye suâl dahi etmemekle müdde‘î-i mezbûr bî-vech mu‘ârazadan men‘ olundu bi’l-iltimâs huzûr-ı âlîlerine i‘lâm olundu. Fermân hazret-i veliyyü’l-emrindir. Fî 2 Cumâdelûlâ sene [1]143.