Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 485 Hüküm no: 566 Orijinal metin no: [115b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çiğil reayasının Zaim Ahmed Bey üzerine açtıkları davanın meşru olmadığı Ma‘rûz. Ashâb-ı arzuhâl Çiğil re‘âyâsı derûn-ı arzuhâlde mezkûrü’l-ism Ahmed Bey mahzarında mezbûr Ahmed Bey bin yüz otuz altı senesenden bin yüz kırk üç senesine gelince tarafından mültezim olan Mehmed nâm kimesne zâlim olup kendilerden müte‘addiden ziyâde zulmen akçelerini alıp ve tecrîm ve tağrîm ve habs ve darb ile bizi rencîde etmişidi deyü teşekkî ve mültezim-i merkūmun zulmen kendilerden aldığı akçeyi za‘îm-i mezbûrdan taleb ve da‘vâ ettiklerinde mültezim-i merkūm diyâr-ı âharda olup zulmen akçelerini aldığı sâbit olduğu sûretde dahi kendiden lâzım gelip za‘îm-i mezbûrdan da‘vâları meşrû‘ olmamağla za‘îm-i mezbûra bî-vech mu‘ârazaları şer‘an men‘ olunmak iktizâ eder lâkin ba‘de’l-yevm bu makūle zâlime ze‘âmeti karyelerini ilzâm etmeyip dindâr ve müstakīm adamlara verilmekle re‘âyâ fukarâsını rencîde ve remîde ettirmemek üzere za‘îm-i mezbûra tenbîh-i ekîd olunduğu huzûr-ı âlîlerine i‘lâm olundu. Fermân hazret-i veliyyü’l-emrindir. Fî-gurreti Cumâdelûlâ sene [1]143.