Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 484 Hüküm no: 565 Orijinal metin no: [115b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dokumacı ve sair esnafın boyacı esnafıyla ilgili ellerinde olan fermanın üzerine hatt-ı hümayun keşîdesi talebi Ma‘rûz. İstanbul’da vâki‘ bogasıcı hırfetinin kethüdâları es-Seyyid el-Hâc Abdullah ve hırfet-i mezbûrdan İbrahim b. Mustafa ve Hüseyin b. Hasan ve Mehmed b. Hamza ve es-Seyyid Abdullah b. Mehmed ve Hacı Halil b. Hasan ve sâir müseccelü’l-esâmî üç yüz yetmiş bir nefer ve kuşakçılar hırfetinin kethüdâları Mehmed b. Mehmed ve hırfetden yüz yetmiş bir nefer hilâlî kuşakçı hırfetinin kethüdâları Ali b. Mehmed ve hırfetden yüz altmış beş nefer ve peştamâlci hırfetinin kethüdâları Mustafa b. Mehmed ve hırfetden yüz doksan yedi nefer ve beledîciler kethüdâsı Mehmed b. Mustafa ve hırfetden yüz elli nefer ve seccâde kilimi dokuyan hirfet kethüdâsı es-Seyyid Ali ve hırfetden yirmi beş nefer ve kara kuşakçı hırfetinin kethüdâları Mehmed b. Ali ve hırfetden yirmi beş nefer gazzâzlar kethüdâsı Ali b. Mustafa ve hırfetden üç yüz yetmiş sekiz nefer ve sandalcılar kethüdâsı Abdullah ve hırfetden üç yüz kırk iki nefer ve Çarkuşakçı hırfetinin kethüdâları Mustafa ve hırfetden yirmi bir nefer kimesneler meclis-i şer‘de boyacı hırfetleri bundan akdem Fazlıpaşa sarayında iskân olunandan berü yek-dil ve yek-cihet ve boyaları kalb olduğundan mâ‘adâ ziyâde akçelerimizi alıp ve envâ‘ türlü cevr ü gadr ve eziyetlerine binâen mezbûrûn boyacı tâifesinden teşekkî ve arzuhâl eylediğimizde muhdes olan bid‘atlarından olmağla ref‘ olunup saray-ı merkūmdan ihrâcları bâbında yedimize emr-i âlîşân ihsân olunmuş idi lâkin mezbûrûn boyacı hırfetinin yedlerinde atîk hatt-ı şerîfleri olmağla ba‘de zamân yine bid‘at-ı kadîme avdet eder havfından nâşî bizim yedlerimize inâyet buyrulan fermân-ı âlîşân üzerine dahi hatt-ı hümâyûn şevket-makrûn keşîde kılınmak ricâ eder deyü istid‘âyı inâyet ettikleri der-i devlet-medâra bi’l-iltimâs huzûr-ı âlîlerine i‘lâm olundu. Fermân hazret-i veliyyü’l-emrindir. Fî 4 Cumâdelûlâ sene [1]143.