Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 485 Hüküm no: 568 Orijinal metin no: [115b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Avram’ın kanuna aykırı olarak kebabçı ve işkenbeci dükkanı açmasına izin verilmemesi Ma‘rûz. İstanbul’da Yahûdi tâifesinin kebabçı ve işkenbeci hırfetinin kethüdâları olan David ve Mosi ve hırfet-i mezbûrdan müseccelü’l-esâmî Yahûdiler meclis-i şer‘de işbu yedimizde olan emr-i âlîşân mantûkunca beylik zağarlara ta‘yîn verilmek üzere on aded kebabçı ve işkenbeci dükkânı olup bundan ziyâde ve noksan olmayıp ve mahalleri dahi tebdîl ve tağyîr olunmamak üzere yedimizde müte‘addid i‘lâm ve evâmir-i şerîfelerimiz var iken gāib ani’l-meclis arzuhâl sâhibi Avram Yahûdi hilâf-ı fermân ve hilâf-ı kadîm istediği mahalde dükkân ihdâs ederim sevdâsına düşüp hîle ve hud‘a ile dâimâ rencîde ve murâfa‘aya tâlib olduğumuzda ihtifâ ve murâfa‘adan imtinâ‘ eder deyü takrîrlerine mutâbık müte‘addid i‘lâm ve evâmir-i aliyye ibrâz eylediklerinden mâ‘adâ mesfûr Avram ecânibden olup hizmet-i mezbûrede dahi kat‘â alâkası olmadığı ihbâr olunmağla min-ba‘d umûrlarına müdâhale ettirilmemek bâbında. Emr ü fermân hazret-i veliyyü’l-emrindir. Fî 5 Cumâdelûlâ sene [1]143.