Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 486 Hüküm no: 569 Orijinal metin no: [116a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sima bt. Ohan’ın vakıf arsa üzerine inşa ettiği evin herhangi bir zararı olmadığı Ma‘rûz. Keşf. İmtisâlen li’l-emri’l-âlî kıbel-i şer‘-i şerîfden ba‘s olunan keşif nâibi Abdurrahman Efendi dâ‘îleri bi’l-fi‘il ser-mi‘mârân-ı hâssa izzetlü İbrahim Efendi ile İstanbul’da Tevkī‘î Ca‘fer Mahallesi’nde vâki‘ Mekînî Zülfikār Ağa Vakfı’ndan derûn-ı arzuhâlde mezkûr Sinan Kalfa’nın zevcesi Sima bt. Ohan tasarrufunda olup ba‘de’l-harîk binâsına mübâşeret ettiği nâ-tamam menzile varıp ba‘de akd-i meclis menzil-i merkūm vakf-ı mezbûrun seddi üzerinde vâki‘ olup esfelinde sed duvarına mülâsık ve Dülgeroğlu Vakfı’ndan bir bâb menzile mutasarrıfe olan sahibetü arzuhâl Zümrüd bt. Gabril’in oğlu ve husûs-ı âtîye vekîl-i nâibü’l-vekâlesi Agop v. Harbab meclis-i ma‘kūd-ı mezkûrda merkūme Sima muvâcehesinde vakfeyn-i mezbûreyn mütevellîleri hâzırân oldukları hâlde kable’l-harîk menzileyn mâbeyninde tûlen on bir buçuk zirâ‘ ve arzen nısf zirâ‘ aralık var iken hâlâ mesfûre Sima ol aralığı menziline ilhâk ve binâsını müvekkile-i merkūmenin binâsına ilsâk ve saçağını kat‘ ve duvarını isti‘mâl murâd eder ve binâsını fermân-ı âlîye mugāyir ifrât üzere terfî‘ sebeble müvekkilemin menzili ziyâsını kat‘ eylemişdir dedikde mesfûre Sima cevâbında merkūme Zümrüd’ün sakfı hâlâ olduğu gibi kable’l-harîk dahi beşik örtüsü olup damlası iki cânibe akıp benim tarafımda damlalığı olmayıp saçağı hürmet saçağı olmağla tasarrufumda olduğu hasmımın i‘tirâfıyla sâbit olan arsa üzerine gelen mikdârı lâ-cerem kat‘ ve binâsına vaz‘ ve kadîmî üzere ilsâk eylediğim direkler mâbeynini dolma duvar edip kendi duvarını kat‘â isti‘mâl etmem ve müvekkile-i mesfûrenin menzili taraf-ı âhardan müstefî? olmağla binâmın irtifâ‘ının menzili ziyâsına mümâna‘atı yokdur dedikde izzetlü mi‘mâr ağa mesfûre Sima’nın binâsının irtifâ‘ına nazar ettikde Oseb tarafına muttasıl sokakdan irtifâ‘ı ancak yedi buçuk zirâ‘ olmağla mugāyir-i fermân-ı âlî olmayıp ve mezbûre Zümrüd’ün menzili cânibinde olan irtifâ‘ı ziyâsına kat‘â mâni‘ olmayıp ve menzileyn mâbeyninde kadîmden damlalık olduğunu vekîl-i merkūm dahi i‘tirâf ve kable’l-harîk mezbûre Sima’nın menzili direkleri mesfûre Zümrüd’ün duvarına mülâsıken mansûbe idiğini mahalle-i merkūme ahâlîsinden olup beynlerinde makbûlü’ş-şehâde olan Ferhad v. Ohan ve Abdal v. Kirador nâm zimmîler dahi alâ-tarîkı’ş-şehâde haber vermeleriyle müvekkile-i mesfûreyi bî-vech mu‘ârazadan men‘ eylediğini mezkûr dâ‘îleri mahallinde tahrîr ba‘dehû ma‘an ba‘s olunan ümenâ-i şer‘le bu dâ‘îlerine inhâ eylediği huzûr-ı âlîlerine i‘lâm olundu. Bâkī emr hazret-i veliyyü’l-emrindir. Fî-gurreti Cumâdelûlâ sene [1]143.