Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 488 Hüküm no: 571 Orijinal metin no: [116a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Çelebi’den vârislerine intikal eden evin kız kardeşi Rukiye Hatun tarafından kiralandığı Ma‘rûz. Sâdır olan fermân-ı âlîlerine imtisâlen kıbel-i şer‘den ba‘s olunan keşif nâibi Abdurrahman Efendi hâssa mi‘mârlarından Hüseyin Halîfe b. Ömer ile İstanbul’da Sofular Mahallesi’nde vâki‘ derûn-ı arzuhâlde mezkûr menzile varıp ba‘de akdi’l-meclis menzil-i merkūmun hareminin sülüsânına şâyi‘an mâlik olan Abdi Çelebi b. Ali Efendi b. Ali fevt olup hasren vâriseleri zevcesi Zeliha Hatun bt. Ahmed b. Ali ve sulbiye sagīre kızı Fâtıma ile li-ebeveyn kız karındaşı Rukiye Hatun’u terk ve menzil-i merkūmdan hissesinin sekiz sehminden bir sehmi mezbûre Zeliha Hatun’a ve dört sehmi mezbûre Fâtıma’ya ve bâkī üç sehmi mezbûre Rukiye’ye isâbetinden sonra sagīre-i mezbûrenin vasiyy-i mansûbesi mezbûre Zeliha’nın zevci husûs-ı âtîye tarafından vekîl olduğu zâtını ma‘rifet-i şer‘iyye ile ârifân Hasan Efendi b. Mustafa ve Abdi Çelebi b. el-Hâc Mehmed [116b] şehâdetleriyle sâbit olan Osman Çelebi b. Süleyman meclis-i ma‘kūd-ı mezkûrda zâtı hâzır bi’l-meclis olan cemâ‘at-i Müslimîn ta‘rîfleriyle mu‘arrefe olan mezbûre Rukiye Hatun muvâcehesinde müvekkilem mezbûre Zeliha Hatun’un menzil-i merkūmdan bir sehm şâyi‘i ile sagīre-i merkūmenin dört sehm şâyi‘i ma‘an mezbûre Rukiye Hatun’un üç sehm şâyi‘inden ifrâz mümkün ise ifrâz olunup değil ise ya muhâyeeten yâhud îcâr olunmak bi’l-vekâle matlûbumdur dedikde gıbbe’t-tasdîk mi‘mâr-ı mezkûr Müslimîn-i hâzirûn ile menzil-i merkūma ba‘de’n-nazar ifrâz sûretinde gālî sütrelere ve mesârif-i azîmeye ihtiyâcdan mâ‘adâ münâsib kapı mahalli olmayıp ve muhâyeeten de nakl-i iskāl meşakkati olmağla tarafeynin rızâları ve Müslimîn-i hâzirûnun re’y ve istihsânları ile vekîl-i mezbûr Osman Çelebi müvekkile-i mezbûre Zeliha Hatun’un bir sehmini ve sagīre-i merkūmenin dört sehmini sihâm-ı hamsenin ecr-i misli olan beher mâh üç yüz altmış akçe icâre ile mezbûre Rukiye Hatun’a bi’l-vekâle târih-i i‘lâmdan îcâr ve mezbûre Rukiye Hatun dahi menzil-i merkūmun meremmet-i müstehleke makūlesi meremmât-ı yesîresini kendi mâlıyla bilâ-rücû‘ görüp beher mâh üçer yüz altmışar akçe ile istîcâr ve kabûl ve ba‘de’l-yevm işledikçe icâreyi müvekkile-i merkūmeye edâya ta‘ahhüd eylediğini mezkûr dâ‘îleri mahallinde tahrîr ba‘dehû ma‘an ba‘s olunan ümenâ-i şer‘le bu dâ‘îlerine inhâ eylediği huzûr-ı âlîlerine i‘lâm olundu. Bâkī emr hazret-i veliyyü’l-emrindir. Fî selhi Rebî‘ülâhir sene [1]143.