Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 487 Hüküm no: 570 Orijinal metin no: [116a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Salamon mahzeninin Ayşe Hatunun evine zararı olacağı için müsaade olunmaması Ma‘rûz. Vârid olan fermân-ı âlîlerine imtisâlen savb-ı şer‘den ba‘s olunan keşif nâibi Abdurrahman Efendi dâ‘îleri hâssa mi‘mârlarından el-Hâc Mehmed Halîfe ile Hasköy nâhiyesinden Pîrîpaşa kurbünde Turşucu Hüseyinçelebi Mahallesi’nde bu dâ‘îlerinin nezâretlerinde olan Hasanpaşa Vakfı’ndan mahall-i nizâ‘ olan Yahûdhâneye varıp ba‘de akdi’l-meclis ol Yahûdhâne bi’l-icâreteyn mutasarrıfe olan Âişe Hatun bt. Mustafa Efendi b. el-Hâc Murad’ın zevci ve tarafından vekîl olduğu Mehmed Çelebi b. Mustafa ve Mustafa Çelebi b. Hasan şehâdetleriyle sâbit olan müderrisîn-i kirâmdan Mahmud Efendi b. Mustafa meclis-i ma‘kūd-ı mezkûrda yine vakf-ı mezbûrdan ol Yahûdhâneye muttasıl arsaya mutasarrıf olan Salamon v. Rabağ nâm Yahûdi muvâcehesinde kāimmakām-ı mütevellî-i vakf-ı mezbûr es-Seyyid el-Hâc Abdulkādir Çelebi b. İbrahim hâzır olduğu hâlde mesfûr Salamon arsa-yı merkūme üzerine vaz‘ eylediği binânın irtifâ‘ ve kurbü sebebiyle müvekkilemin Yahûdhânesinin işbu vustânî ve tahtânî iki bâb odasının ziyâsını kat‘ etmekle zarar-bînî vardır deyü bi’l-vekâle ba‘de’d-da‘vâ ve’l-inkâr mi‘mâr-ı mezbûr ol odaların mukābelesinde mesfûr Salamon’un ihdâs edeceği mahzen cânibine sütre asıp ifrât üzere muzlim olup ve ziyâ alacak âhar mahalli dahi olmamağla ol mahalle binâ vâki‘ olmak sebeb-i zalâm-i müfrit olup zarar-bînî müte‘ayyin olmağın ol mahzen mahalli olan tûlen dört buçuk zirâ‘ ve arzen kezâlik dört buçuk zirâ‘ mevzi‘i bâ‘is-i zalâm olup binâdan hâlî etmek üzere mesfûr Salamon Yahûdi’ye tenbîh eylediğini mezkûr dâ‘îleri mahallinde tahrîr ba‘dehû ma‘an ba‘s olunan ümenâ-i şer‘le bu dâ‘îlerine inhâ eylediği huzûr-ı âlîlerine i‘lâm olundu. Bâkī emr hazret-i veliyyü’l-emrindir. Fî-gurreti Cumâdelûlâ sene [1]143.