Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 489 Hüküm no: 575 Orijinal metin no: [116b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gasben alınan paranın teslimi için tenbih Ma‘rûz. Kapıkethüdâsı İbrahim Beşe mübâşeretiyle Bâb Mahkemesi’ne ihzâr olunan İbrahim’in hasmı olup İnebolu kazâsına tâbi‘ Karaca nâm karyede sâkin Osman b. el-Hâc Mehmed b. Bayram tarafından vekîl olduğu el-Hâc Osman b. Ahmed ve Ahmed Beşe b. İsmail şehâdetleriyle sâbit olan vekîl el-Hâc Abdullah meclis-i şer‘de mezbûr İbrahim muvâcehesinde târih-i i‘lâmdan iki sene mukaddem mezbûr İbrahim Küretü’n-nuhâs voyvodası tarafından karye-i mezbûre gelip müvekkilim mezbûre Osman’ı bi-gayr-ı cerem muâheze ve bi-gayr-ı hakkın gasben otuz guruşunu ahz etmekle bi’l-vekâle taleb ederim deyü da‘vâ eyledikde ol dahi ikrâr u i‘tirâf etmeğin mûcebiyle meblağ-ı mezbûr otuz guruşu vekîl-i mezbûr el-Hâc Abdullah’a edâya mezbûr İbrahim’e tenbîh olunduğu bi’l-iltimâs huzûr-ı âlîlerine i‘lâm olundu. Fî 6 Cumâdelûlâ sene [1]143.