Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 62 Hüküm no: 54 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a zahire giriş çıkışının kontrolü hakkındaki emre kesinlikle uyulması Emîrü’l-ümerâ’i’l-kirâm kebîrü’l-küberâ’i’l-fihâm zü’l-kadri ve’l-ihtirâm sâhibü’l-izzi ve’l-ihtirâm mine’l-muhtasmezîd-i inâyeti’l-meliki’l-a‘lâ ber-vech-i arpalık Kocaeli sancağına mutasarrıfı ( ) -dâme’l-ikbâlü- ve mefâhirü’l-kuzât ve’l-hükkâm ma‘denü’l-fezâil ve’l-hükkâm Kartal’dan Çınarcık’a varınca İznikmid Körfezi’nde vâki‘ kuzât ve nüvvâb -zîde fazluhum- ve mefâhirü’l-emâsil ve’l-akrân serdârlar ve sâir zâbitân -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki Âsitâne-i sa‘âdetimde sâkin ibâdullahın erzâk-ı yevmiyeleri’çün Bahr-ı siyâh tarafından tedârük ve isticlâb olunan hıntayı hufyeten kayıklar reisleri ve sâir kimesneler iştirâ ve bir tarîk ile kayıklara vaz‘ ve ol mahâlden nakleyledikleri tahkīkan ve sahîhan ihbâr olunup bu hâlet-i müfside Âsitâne-i sa‘âdetimde mukīm ibâdullahın tenk-i ma‘âşlarına ve kıllet ve zarûret ve firuhte? bâ‘is olduğundan gayrı Âsitâne-i aliyyemden taşraya zahîre nakli evâmir-i şerîfemle memnû‘ iken bu hilâlde dekk ü hîle ile hınta ve zehâir-i sâirenin taşralara nakl ve fürûht olunduğuna bir türlü rızâ-i hümâyûnum olmayup bu mel‘anete cesâret edenlerin ahz ü te’dîbi ve tahzîr ü ...? ehemm-i mehâmm-ı Devlet-i aliyyemden olmağla ba‘de’l-yevm iskelelerinize İslambol’dan varan kayıklara gereği gibi bakıp İsakçı Anbarı’ndan tersâne-i âmirem anbarına gelüp İslambol harcı olmakdan nâşî fürûht olunup İslambol Gümrüğü emîninden yedlerinde tezkiresi olanlardan mâ‘adâ kayıklar derûnunda bulunan hıntayı ahz ve bir mahâll-i mahfûza vaz‘ ü hıfz ve İsakçı hıntasından gayrı hıntayı götürenleri eyyen men-kân ahz ve muhkem habsedip kayıkda zuhûr eden hıntanın mikdârını ve reis ve sâhibinin isimlerini Der‘alliyem’e tahrîr ve i‘lâma müsâra‘at ve bu bâbda tenfîz-i emr-i şerîfimde iğmâz edenlerin bilâ-emân haklarından gelinmek musammem ve muhakkak olduğun bilerek bu emr-i memnû‘a gāyetü’l-gāye nezâret ve ihtimâm ve sa‘y ü ikdâm eyleyüp ser-i mû iğmâz ve müsâmahadan be-gāyet tevakkī ve mücânebet eylemeniz bâbında fermân-ı âlîşânım sâdır olmuşdur mübâşir ta‘yîn olunan sadrıâzam çukadârlarından Kurd Mahmud -zîde kadruhüm- vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla âmil olup hilâfından gāyetü’l-gāye hazer ve mücânebet eyleyesiz şöyle bilesiz alâmet-i şerîfe i‘timâd kılasız. Tahrîren fî-evâili Recebi’l-ferd li-sene tis‘a ve seb‘în ve mi’ete ve elf. Be-makām-ı İslambol.