Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 492 Hüküm no: 580 Orijinal metin no: [117b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duvar inşasısı davası keşfi Ma‘rûz. Sâdır olan fermân-ı âlîlerine imtisâlen cânib-i şer‘-i kadîmden irsâl olunan keşif nâibi Abdurrahman Efendi dâ‘îleri hâssa mi‘mârlarından el-Hâc Mustafa b. Ali nâm halîfe ile İstanbul’da Tevkī‘î Ca‘fer Mahallesi’nde Âişe Hatun Vakfı’ndan Manol v. İstiradi nâm zimmî tasarrufunda olan menzile varıp ba‘de akdi’l-meclis yine mahalle-i mezbûrede menzil-i merkūma muttasıl sed üzerinde vâki‘ el-Hâc Ömer Vakfı’ndan bir bâb menzile mutasarrıf olan Yasef v. Hakverdi nâm zimmî meclis-i ma‘kūd-ı mezkûrda mezbûr Manol muvâcehesinde vakf-ı evvel mütevellîsi Mehmed Çelebi b. Receb ile vakf-ı sânî mütevellîsi sâhib-i arzuhâl diğer Mehmed Çelebi b. Osman Efendi hâzırân oldukları hâlde benim mutasarrıf olduğum menzilin sed duvarının iki ayağı ve mâbeyni dahi benim mutasarrıfımda olmak iktizâ ederiken binâsını ol sedde yanaşdırmağla ref‘ etsin dedikde mezbûr Manol cevâbında benim binâm kadîmden ale’l-harîk ol sed duvarına muttasıl ve ol ayaklar muhdes olmağın binâen-aleyh yanaşdırdım ve ol sed duvarı çamur ile olup ve vehninden nâşî üzerime inhidâmından havf ederim dedikde mi‘mâr-ı mezbûr hâzır olan ehl-i vukūf ile nazar ve ol ayakların ol sedde ittisâli terbî‘i olmayıp mücâveret tarîkiyle olmasından ve câ be-câ aralıklar olmasından ol ayakların muhdes olmasına ve ol seddin kıyâm ve istihkâmına medâr olmasına istidlâl ve tarîk-i istihkâmı ol sed horasan ve kireç ile kârgîr binâ olunmak idiğini bi’l-ittifâk haber verip mezbûr Yasef dahi kable’l-harîk merkūm Manol’un binâsını ol sedde muttasıl idiğini ikrâr etmeğin binâsı alâ-hâlihî terk olundukdan sonra mezbûr Manol nef‘an li’l-cânibeyn ol ayakları ref‘ ve ol seddin kadîmî temeli üzerine horasan ve kireç ile kârgîr ve müstahkem sed duvarını ihtiyârıyla kendi mâlından vakf-ı sânîye teberru‘an binâ etmek üzere ta‘ahhüd ve bu vech üzere terâzîlerini mezkûr dâ‘îleri mahallinde tahrîr ba‘dehû ma‘an ba‘s olunan ümenâ-i şer‘le bu dâ‘îlerine inhâ eylediği huzûr-ı âlîlerine i‘lâm olundu. Bâkī emr hazret-i veliyyü’l-emrindir. Fî 24 Rebî‘ülâhir sene [1]143.