Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 491 Hüküm no: 579 Orijinal metin no: [117a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bardakçı, destici ve çömlekçi esnafının su künkçü esnafının işlerine müdahale etmemeleri gerektiği Ma‘rûz. Medîne-i Hazret-i Ebî Eyyübü’l-Ensârî’de vâki‘ su künkü işleyen hirfet erbâbından ashâb-ı arzuhâl kethüdâları Veys ve hırfet-i mezbûreden Mehmed ve Ahmed ve Süleyman nâm kimesneler medîne-i mezbûrede vâki‘ bardakçı ve destici ve çömlekçi hırfetinden Mehmed b. Musa ve karındaşı Mustafa ve âhar karındaşı İsmail ve Kullaboğlu Ali nâm kimesneler muvâcehelerinde biz kadîmden berü medîne-i mezbûrede dört aded künkçü kârhânesi erbâbından olup işbu yedimizde olan müte‘addid evâmir-i aliyyeler mantûkunca bardakçı ve destici ve çömlekçi hırfetinden bizim san‘atımıza kat‘â müdâhale olunmak îcâb etmez iken mezbûrûn dört nefer çanakçı ve çömlekçi hırfetinden iken kendi san‘atlarına kanâ‘at etmeyip bize mahsûs olan su künkünü Soğancıbaşı Ahmed Ağa nâm kimesneye istinâden bir seneden berü hilâf-ı kadîm işleyip gadretmişlerdir deyü teşekkî ettiklerinde mezbûrûn dahi cevâblarında an-asl bardakçı ve çömlekçi hırfetinden olup künkçü hırfetinden olmadıklarını ikrâr eylediklerinden mâ‘adâ kendi hırfetleri erbâbından müseccelü’l-esâmî yetmiş yedi nefer kimesneler meclis-i şer‘de kadîmden berü yedlerinde olan atîk evâmir-i aliyyeler mantûkunca medîne-i mezbûrede dört aded künkçü kârhânesi ve kırk iki aded bardakçı ve çanakçı ve çömlekçi kârhânesi olup kat‘â birbirlerine müdâhale ve mu‘âraza olunduğu yokdur deyü ihbâr etmeleriyle yedlerinde olan emr-i âlî mantûkunca mezbûrûn Bardakçı Mehmed ve Mustafa ve İsmail ve Ali’ye min-ba‘d ashâb-ı arzuhâl künkçüyân hırfetinin umûrlarına müdâhale etmemek üzere tenbîh olunduğu huzûr-ı âlîlerine i‘lâm olundu. Bâkī fermân men-lehü’l-emrindir. Fî 8 Cumâdelûlâ sene [1]143.