Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 493 Hüküm no: 582 Orijinal metin no: [117b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbtî Mehmed’in Safiye’yi boşadığı sabit olduğundan eşinin mehrini ödemeye tenbih olunduğu Ma‘rûz. Kıbtiyân tâifesinden olup Muhzır Mustafa mübâşeretiyle Mahkeme-i Bâb’a ihzâr olunan Mehmed’den hasmı zevcesi Safiye nâm Kıbtiye meclis-i şer‘de merkūm Mehmed târih-i i‘lâmdan yedi ay mukaddem zevciyyet beynimizde kāim olduğu hâlde senin üzerine teehhül edersem üç talâk benden boş ol deyü şart ve ta‘lîk edip hâlâ âhar hatun tezvîc etmeğin şart-ı mezkûrun vukū‘una binâen ben mezbûr Mehmed’den ber-vech-i muharrer mutallaka olmamla zimmetinde mütekarrir ve ma‘kūdun-aleyh dört bin akçe mehrimi taleb ederim deyü da‘vâ ve mezbûr Mehmed cevâbında mehr-i mezkûr ile müdde‘iyye-i mezbûre[nin] zevce-i menkûhası olduğunu ikrâr lâkin şart-ı mezkûru inkâr etmekle müdde‘iyye-i mezbûre müdde‘âsını şuhûd-ı udûlle muvâcehesinde ba‘de’l-isbât mûcebince meblağ-ı mezbûr dört bin akçe mehr-i müeccelini hâlâ ve iddeti münkaziye oluncaya değin bi’t-terâzî ta‘yîn olunan dört yüz akçeyi müdde‘iyye-i mezbûreye edâ ve teslîme mezbûr Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî-gurreti Cumâdelûlâ sene [1]143.