Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 494 Hüküm no: 583 Orijinal metin no: [117b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaralama davasında sulh olduğu Ma‘rûz. Kollukçu Hüseyin Beşe mübâşeretiyle Bâb Mahkemesi’ne ihzâr olunan Dergâh-ı âlî cebecilerinin on dördüncü bölüğe mahsûs oda neferâtından Mustafa Beşe b. Ahmed’in hasmı Karabet nâm zimmî meclis-i şer‘de mezbûr Mustafa Beşe târih-i i‘lâmdan on sekiz gün mukaddem mahrûse-i Galata’ya tâbi‘ kasaba-i Kasımpaşa’da Aynalıkavak nâm mahalde ba‘de’l-asr pala tâ‘bir olunur âlet-i câriha ile sol elimi bileğinden bi-gayr-ı hakkın amden darb ve kat‘ ve sol yüzümü ve sol pazumu dahi darb ve cerh etmekle mûceb-i şer‘îsini mezbûr Mustafa Beşe’den ba‘de’d-da‘vâ ve’l-inkâr ben dahi müdde‘âmı isbât sadedinde iken beynimize muslihûn tavassut edip da‘vâ-yı mezkûremden beni mezbûr Mustafa Beşe ile an-inkâr yüz guruş bedel-i makbûza sulh eylediklerinde ben dahi [118a] sulh-ı mezkûru kabûl edip cerh-i mezbûra ve mâ-yehdesü anhu müte‘allika âmme-i de‘âvî ve kâffe-i mütâlebâtdan mezbûr Mustafa Beşe ile refîki Ali Beşe nâm kimesnenin zimmetlerini ibrâ ve iskāt eylediği ba‘de’t-tescîl bi’l-iltimâs huzûr-ı âlîlerine i‘lâm olundu. Fî 11 Cumâdelûlâ sene [1]143.