Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 497 Hüküm no: 591 Orijinal metin no: [118b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Osman’a borcunu ödeme tenbihi Ma‘rûz. Mumcu Mustafa Beşe mübâşeretiyle ihzâr-ı şer‘ olunan el-Hâc Osman b. Hüseyin’den bundan akdem katîlen vefât eden Arab el-Hâc Mustafa b. Abdullah’ın sulbî sagīr oğlu Mehmed’in vâlidesi ve tesviye-i umûruna kıbel-i şer‘den mansûbe vasîsi olan Meryem Hatun meclis-i şer‘de müteveffâ-i mezbûr el-Hâc Mustafa hayâtında mâlından iki bin guruş ifrâz ve teslîm ol dahi yedinden iktirâz ve tesellüm ve mesârifine istihlâk edip zimmetinde iken kable’l-ahz vefât etmeğin taleb ederim deyü ba‘de’d-da‘vâ ve’l-inkâr müdde‘iyye-i mezbûre müdde‘âsını şuhûd-ı udûlle isbât etmeğin mûcebince meblağ-ı mezkûr iki bin guruşu mezbûre vasîye edâ ve teslîme mezbûr el-Hâc Osman’a tenbîh olunduğu huzûr-ı âlîlerine i‘lâm olundu. Fî 19 Cumâdelûlâ sene 1143.