Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 497 Hüküm no: 593 Orijinal metin no: [118b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nuh b. el-Hâc Hasan’ın ölümü ile ilgili davanın reddolunduğu Ma‘rûz. Kasaba-i Hasköy’de Kiremidçi Mahallesi ahâlîsinden iken bundan akdem vefât eden Nuh b. el-Hâc Hasan’ın li-ebeveyn karındaşı ve hasren vârisesi olan Sâhibe-i arzuhâl Rukiye Hatun meclis-i şer‘de derûn-ı arzuhâlde mezkûrü’l-esâmî İbrahim ve Mehmed Beşe ve diğer Mehmed nâm kimesneler muvâcehelerinde mezbûrûn İbrahim ve Mehmed Beşe ve diğer Mehmed târih-i i‘lâmdan yetmiş iki gün mukaddem mahalle-i mezbûre mescid-i şerîfi kurbünde karındaşım müteveffâ-i mezbûru bi-gayr-ı hakkın amden darb ve cerh ve müteessiren vefât etmekle mûceb-i şer‘îsini taleb <> ederim deyü da‘vâ eylediğinde onlar dahi cevâbında husûs-ı mezkûru inkâr eylediklerinden mâ‘adâ müteveffâ-i mezbûr Nuh hâl-i hayâtında husûs-ı mezkûru bizden da‘vâ ve muslihûn tavassutuyla an-inkâr bizimle elli guruş bedel-i makbûza sulh ve cerh-i mezbûra ve mâ-yehdesü minhu müte‘allika âmme-i da‘vâdan zimmetimizi ibrâ ve iskāt eylemişidi deyü def‘ ve def‘-i mezkûrlarına mutâbık bir kıt‘a hüccet-i şer‘iyye ibrâz edicek mezbûre Rukiye inkâr etmekle mezbûrûn mazmûn-ı hüccet-i mezkûreyi müdde‘iyye-i mezbûre muvâcehesinde es-Seyyid Salih b. es-Seyyid Mehmed ve İbrahim b. Mustafa ve Mehmed b. Abdullah ve Ali b. Mehmed ve İbrahim b. Mustafa nâm kimesneler şehâdetleriyle vech-i şer‘î üzere isbât etmeleriyle mezkûre Rukiye bî-vech mu‘ârazadan men‘ olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 20 Cumâdelûlâ sene [1]143.