.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 263
Hüküm no: 369
Orijinal metin no: [54a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ayşe bt. Yusuf Çavuş’un Selim Çorbacı’daki alacağına karşılık kendisinden kahve alarak zimmetini ibra ettiği

Mahmiye-i İstanbul’da Elvanzâde Mahallesi sâkinlerinden Âişe bt. Yusuf Çavuş nâm hatun mahfil-i şer‘-i şerîfde tüccâr-ı zevi’l-iktidârdan olup merhûm olan el-Hâc Kasım İncirar’ın sulbî oğlu işbu sâhibü’l-kitâb Selim Şorbacı mahzarında ikrâr-ı tâm ve takrîr-i kelâm edip babam müteveffâ-i mezbûr Yusuf Çavuş’un medîne-i Mısr-ı Kāhire’de Salih Bey çarşısında tüccârdan Ömer Ağa kethüdâsı çavuş zimmetinde yirmi bin yüz otuz para hakkı olup meblağ-ı mezbûru kable’l-istîfâ babam mezbûr Yusuf Çavuş müteveffâ olup bi-hasebi’l-irsi’ş-şer‘î bana intikāl etmeğin meblağ-ı mezbûru taleb ve da‘vâ ve ahz u kabz ve îsâl ve kabz [ve] îsâle mütevakkıf olduğu umûra ve âharı tevkîle İsmail Çelebi nâm kimesneyi tevkîl ve nâib-i menâb nasb ve ta‘yîn eylemiş idim, ol dahi vekâlet-i mezbûreyi kabûl eyleyip ve meblağ-ı mezbûru medyûn-ı merkūmdan ahz u kabz eyleyip lâkin îsâlinde usret ve hatar-ı tarîk sebebiyle vekîlim mezbûr İsmail Çelebi meblağ-ı mezbûru medîne-i mezbûrede sâkin tüccâr-ı zevi’l-iktidârdan olup mezbûr Selim Şorbacı’nın ammi ve şerîki olan el-Hâc Mehmed İncirar’a teslîm ve bana îsâl için tevkîl eyledikden sonra mezbûr el-Hâc Mehmed dahi karındaşı oğlu ve şerîki mezbûr Selim Şorbacı’ya meblağ-ı mezbûru bana teslîm eylemek üzere emr edip mektûb ve adam gönderip mezbûr Selim Şorbacı dahi bana her vakıyyesi otuzar paraya olmak hesâbı üzere altı yüz yetmiş bir vakıyye kahveyi yir[mi] bin yüz otuz paraya bey‘ ve teslîm ben dahi iştirâ ve tesellüm eyleyip semen-i mezbûru meblağ-ı merkūma takās edip mevrûsum olan yirmi bin yüz otuz paraya müte‘allika medyûn-ı mezbûr ve mezbûr el-Hâc Mehmed ve merkūm Selim Şorbacı ile da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu.

Fî-gurreti Recebi’l-ferd li-sene erba‘a ve sittin ve elf.

Şuhûdü’l-hâl: el-Hâc Ali Efendi et-Trablusî, Mehmed Ağa b. Hüseyin kethüdâ-yı Murad Paşa sâbıkā , el-Hâc Yusuf b. Said, el-Hâc Mustafa b. Mehmed, Süleyman Çelebi b. Ahmed, el-Hâc Salim b. Cum‘a, Ahmed b. Said, İbrahim Çelebi b. Davud ve gayruhum mine’l-huzzâr.