|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 262 Hüküm no: 368 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Yako v. Menekşe’nin borcu olduğu
Mahmiye-i İstanbul’da Portukal cemâ‘atinden Yako v. Menekşe nâm Yahûdi meclis-i şer‘-i hatîr-i lâzımü’t-tevkīrde yetmişinci cemâ‘atinden Ahmed Beşe b. Nasuh nâm recül mahzarında ikrâr u i‘tirâf edip mezbûr Ahmed Beşe’den bin yüz seksen dört kıt‘a riyâlî guruş istikrâz eylediğimde mezbûr Ahmed Beşe meblağ-ı mezbûr bin yüz seksen dört kıt‘a riyâlî guruşu bana ikrâz ve teslîm edip ben dahi iktirâz ve tesellüm eyledim, meblağ-ı mârru’z--zikr bin yüz seksen dört kıt‘a riyâlî guruş cihet-i karz-ı şer‘îden mezbûr Ahmed Beşe’ye el-ân zimmetimde lâzımü’l-edâ ve vâcibü’l-kazâ deynimdir dedikde gıbbe’t-tasdîkı’ş-şer‘î Şa‘ban Bey b. Abdullah nâm cündî ile mukırr-ı mezbûrun zevcesi Hera bt. Bolharon nâm Yahûdiye ve Portukal cemâ‘atinden Kemal v. İsak nâm Yahûdi hâzirûn olup meblağ-ı mezbûr bin yüz seksen dört kıt‘a riyâlî guruşdan üçer yüz doksan dört buçuk riyâlî guruşa târîh-i kitâbdan yüz seksen gün tamamına değin üzerimize müeccel olmak üzere merkūm Yako’nun emrini ve mezbûr Ahmed Beşe’nin kabûlünü hâviye kefâlet-i sahîha-i şer‘iyye ile kefîl olduk dediklerinde mâ-hüve’l-vâki‘ ketb ü sebt olundu.
Fî-gurreti şehri Recebi’l-ferd li-sene erba‘a ve sittin ve elf.
Şuhûdü’l-hâl: Hasan Efendi b. Abdullah, el-Hâc Ömer b. Mustafa, Mehmed Çelebi b. Mustafa, Mustafa Çavuş b. Abdullah, Mahmud b. Hamza, Kabil b. Abdullah, İbrahim Çelebi b. Davud, Pîrî Beşe b. Hüseyin, Ali Beşe çukadâr ve gayruhum.
|