Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 499 Hüküm no: 597 Orijinal metin no: [119a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyni’ş-şerifeyn Vakfı’na ait evin boşaltması tenbihi Ma‘rûz. Sâhib-i arzuhâl Ağya nâm zimmî kendi tarafından asâleten ve zevcesi Sergülhas nâm Nasrâniye tarafından sâbitü’l-vekâlesi olmağla vekâleten meclis-i şer‘de derûn-ı arzuhâlde mezkûretü’l-ism Mosik nâm Nasrâniye muvâcehesinde Haremeyni’ş-şerîfeyn Vakfı’ndan olup İstanbul’da Hâccehatun Mahallesi’nde vâki‘ ma‘lûmü’l-hudûd menzili bâ-ma‘rifet-i mütevellî üç yüz on guruş bedel-i makbûza İsmail nâm kimesneden ale’l-iştirâk tefevvüz ve kabûl ve ber-vech-i muharrer hakk-ı müfevvazımız olmuş iken mezbûr Mosik Nasrâniye menzil-i mezbûrda bi-gayr-ı [-hakkın] sâkine olup tasarruf ve zabtımıza mümâna‘at eder deyü bi’l-asâle ve bi’l-vekâle taleb ve da‘vâ eyledikde ol dahi menzil-i mahdûd-ı mezbûr müdde‘î-i merkūm ile müvekkile-i mezbûrenin ale’l-iştirâk hakk-ı müfevvazları olduğunu ikrâr u i‘tirâf etmeğin mûcebince menzil-i mezbûrdan ihrâc ve müdde‘î-i mezbûra teslîme merkūme Mosik nâm Nasrâniyeye tenbîh olunduğu bi’l-iltimâs huzûr-ı âlîlerine i‘lâm olundu. Fî 23 Cumâdelûlâ sene [1]143.