Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 499 Hüküm no: 598 Orijinal metin no: [119a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ahmed Vakfı’nın tevliyetinin Feyzullah’a tevcihi talebi Ma‘rûz. Merhûm el-Hâc Ahmed nâm sâhibü’l-hayrın sâhib-i arzuhâl Feyzullah yedinde olan vakfiye-i ma‘mûlün-bihâsı mantûkunca eslah ve akreb olan kız karındaşı Mü’mine’nin sadrî oğlu Süleyman’ın sulbî oğlu olup ve tevliyet-i mezbûre yevmî üç akçe vazîfe ile evvelâ kendi nefsine ba‘dehû evlâdına ve evlâd-ı evlâdına ba‘de’l-inkırâz eslah ve akreb olana vakf ve şart ve ta‘yîn eylediği vakfiyesinde mastûr olmağla merkūm Feyzullah ber-vech-i muharrer evlâd-ı vâkıf-ı mezbûrdan akreb ve eslah evlâddan olduğunu Mehmed Emin Efendi b. Ali ve Molla Ahmed b. Abdülfettâh ve Ömer b. Mehmed ve Ali b. Hasan ve Ömer b. Ahmed nâm kimesneler meclis-i şer‘de ihbâr etmeleriyle tevliyet-i mezbûre vazîfe-i mersûmesiyle merkūm Feyzullah dâ‘îlerine tevcîh olunmak ricâsında olduğu huzûr-ı âlîlerine i‘lâm olundu. Bâkī emr hazret-i veliyyü’l-emrindir. Fî 22 Cemâziyelevvel sene [1]143.