Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 502 Hüküm no: 606 Orijinal metin no: [119b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kundura dikicisi esnafının yeni dükkan açmamak üzere aralarında anlaştıkları Ma‘rûz. Derûn-ı arzuhâlde mezkûr Frenk tâifesinin giydikleri kundura tâ‘bir olunan papuç dikici hirfet erbâbından olup mahrûse-i Galata’da Balıkpazarı’nda sâkin Praşkeva ve Todori ve Zafiri nâm zimmîler meclis-i şer‘de yine hırfet-i mezbûre erbâbından olup İstanbul’da sâkin Duka ve şerîki Dimitri ve Lizo nâm zimmîler muvâcehesinde hırfet-i mezbûre erbâbı on iki dükkân ve altı adedi Galata’da mârru’z-zikr Balıkpazarı’nda ve altı aded dükkân İstanbul’da Cebeali kapısı ile Fener kapısı beyninde mahsûs olup ve dikilen metâ‘ımızı dükkânlarımızda bey‘ edip âhar mahallerde sâkin ve bey‘ etmemek üzere bundan akdem kavl ü ittifâk ve ahd ü misâk ve ber-vech-i muharrer beynimizde nizâm-ı hâlimiz var iken mesfûrûn Duka ve şerîki Dimitri ve Lizo nâm zimmîler İstanbul’da âhar mahallerde başka dükkân açmak murâd etmeleriyle beynimizde olan nizâmın ihtilâline bâ‘is olurlar deyü teşekkî sadedinde olmalarıyla beynlerine muslihûn tavassut edip Dikicibaşı es-Seyyid Ca‘fer Çelebi hâzır olduğu hâlde ba‘de’l-yevm ber-vech-i muharrer hırfet-i mezbûre erbâbı on iki aded dükkân olup altı aded dükkân Galata’da ve altı aded dükkân İstanbul’da her ne mahalde sâkin olurlar ise olsun[lar] birbirlerine kat‘â mümâna‘at etmeyip ancak diktikleri metâ‘larını sâkin oldukları dükkânlarında bey‘ ve âhar mahalde gezip bey‘ etmemek üzere kavl ü ittifâk ve ahd ü misâk eyledikleri tescîl ve bi’l-iltimâs huzûr-ı âlîlerine i‘lâm olundu. Bâkī fermân men-lehü’l-emrindir. Fî 29 Cumâdelûlâ sene [1]143.