Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 502 Hüküm no: 605 Orijinal metin no: [119b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çamaşırcı esnafı arasında fitne çıkaranların esnafın işlerine müdahalelerinin engellenmesi talebi Ma‘rûz. Câmeşûy hırfetinin kethüdâları Mustafa ve yiğitbaşıları el-Hâc Mehmed ve erbâbından yirmi beş nefer müseccelü’l-esâmî Müslimîn meclis-i şer‘de hırfet-i mezkûr erbâbından el-Hâc Ali b. Yunus ve Hüseyin b. Hasan nâm kimesneler kendi hâllerinde olmayıp dâimâ hırfetimiz erbâbını tahrîk ve sâhib-i cem‘iyet ve hilâf-ı vâki‘ her birimizi rencîde ve ta‘cîz etmeleriyle bundan akdem lede’ş-şer‘i’l-enver mezbûrândan teşekkî eylediğimizde men‘ ve def‘ olunmuşlar iken kanâ‘at etmeyip yine beynimizde ihtilâle bâ‘is olmuşlardır deyü her biri teşekkî ve sû-i hâllerini ihbâr ve takrîrlerine muvâfık iki kıt‘a i‘lâm-birle fermân-ı âlî ibrâz etmeğin fîmâ-ba‘d mezbûrân el-Hâc Ali ve Hüseyin hırfet-i mezkûreden ihrâc ve umûrlarına müdâhale ettirilmemek bâbında fermân-ı âlî iltimâs eyledikleri huzûr-ı âlîlerine i‘lâm olundu. Fermân hazret-i veliyyü’l-emrindir. Fî-selhi Cumâdelûlâ sene [1]143.