Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 508 Hüküm no: 620 Orijinal metin no: [121a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mustafa’nın kethüda kaimmakamı tayin olunduğu Ma‘rûz. Ekmekçi tâifesinden Hâfız Mehmed Efendi ve el-Hâc Hüseyin ve el-Hâc Hasan ve İbrahim Çelebi ve el-Hâc Ali ve es-Seyyid el-Hâc Ahmed ve Mehmed Ağa ve Abdi Çelebi ve el-Hâc Ahmed ve el-Hâc Mustafa ve diğer el-Hâc Ali ve Mehmed ve el-Hâc Ahmed ve tâife-i mezbûreden on beş nefer ma‘lûmü’l-esâmî zimmîlerin kethüdâları alîl olmağla umûrunu ikāmetden izhâr-ı acz ile yine ekmekçi tâifesinden muhtârları olan el-Hâc Mustafa nâm kimesne kāimmakām nasb ve ta‘yîn olundukda ol dahi ba‘de’l-kabûl fîmâ-ba‘d etrâfdan İstanbul’a gelen hınta Kapan-ı dakīk’de mezbûrun muvâcehelerinde semen-i misilleriyle bey‘ u şirâ olunup hufyeten bey‘ u şirâ olunmamak bâbında mezbûrûn ekmekçiler mezbûr el-Hâc Mustafa üzerlerine kıbel-i şer‘den nâzır ta‘yîn olundukda her biri râzı ve ba‘de’l-kabûl husûs-ı mezkûr fîmâ-ba‘d düstûrü’l-amel olup kapan-ı mezkûr defterine kaydolunması için fermân-ı âlî iltimâs ettikleri huzûr-ı âlîlerine i‘lâm olundu. Fermân men-lehü’l-emr hazretlerinindir. Fî 10 Cumâdelâhire sene [1]143.