|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 265 Hüküm no: 372 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Borçlu olarak vefât eden Receb Beşe’nin bağının vârisleri tarafından satıldığı
Mahmiye-i İstanbul’da İzmir iskelesinde pazarcı olup mahmiye-i merkūmede Enserci Solak Mahallesi’nde sâkin iken bundan akdem fevt olan merhûm Receb Beşe b. Ahmed’in bi’l-inhisâr vârisleri olan zevce-i metrûkeleri Hadice bt. Abdullah ve Havvâ bt. Abdullah nâm hatunlar asâleten ve sulbî oğulları Mehmed ve Mustafa ve Ahmed nâm sagīrlerin tesviye-i umûrlarına kıbel-i şer‘den mansûb vasîleri olan el-Hâc Mehmed Bey b. Osman vesâyeten mahfil-i kazâda işbu hâmilü’l-kitâb Mehmed Beşe b. Hüseyin mahzarında herbiri ikrâr-ı tâm ve takrîr-i kelâm edip Üsküdar kazâsına tâbi‘ Kadıköyü demekli ma‘rûf karye sınırında vâki‘ bir tarafı Mustafa b. Süleyman veresesi mülkleri ve bir tarafı Kasabbaşı bağı ve iki tarafı tarîk-i âm ile mahdûd olan bir kıt‘a bağdan rub‘-ı şâyi‘ müteveffâ-i mezbûrun mülk-i hâlisi olmağla ba‘de vefâtihi mezbûrun düyûn-ı müsbitesi kesîr olup irsen intikāl edip mülk-i mevrûsları olmuş idi. Lâkin müteveffâ-i mezbûrun düyûn-ı müsbitesine menkūlâtı vefâ etmemekle zikrolunan hisse-i şâyi‘anın bi’z-zarûre bey‘ olunması lâzım gelmeğin ma‘rifet-i hâkim ile zikrolunan hisse-i şâyi‘anın dahi bey‘a arz olup sûk-ı sultânîde mecâmi‘-i nâs olan yerlerde mirâren ve kirâren nidâ ve müzâyede olundukda mezbûr Mehmed Beşe üzerinde yirmi iki bin nakd râyic fi’l-vakt fıddî akçede [karâr] edip ziyâde ile âhar tâlibi zuhûr etmeyip ragabât-ı nâs bi’l-külliye munkatı‘a olup meblağ-ı mezbûr semen-i misil olduğu mütehakkık oldukdan sonra ol bağın zikr olunan rub‘-ı şâyi‘i mezbûr Mehmed Beşe’ye müteveffâ-i mezbûrun zarûret-i düyûn-ı müsbitesi’çün mezbûru’n-na‘t yirmi iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûretân Hadice ve Havvâ asâleten ve vasiyy-i merkūm el-Hâc Mehmed Bey vesâyeten bey‘ ve teslîm edip ol dahi minvâl-i muharrer üzere iştirâ ve kabûl ve kabz ve tesellüm eyledikden sonra semen-i mezbûrun yirmi iki bin akçesi mezbûr Mehmed Beşe yedinden bi’t-tamam ve’l-kemâl ahz u kabz eyledik, ba‘de’l-yevm mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dediklerinde gıbbe’t-tasdîk ve’t-taleb mâ-vaka‘a ketb ü sebt olundu.
Fi’l-yevmi’s-sâlis min-şehri Recebi’l-ferd li-sene erba‘a ve sittin ve elf.
Şuhûdü’l-hâl: Himmet Beşe b. Ahmed, Şa‘ban b. Mehmed, Osman Çelebi b. el-Hâc Mehmed, Şa‘ban Çelebi b. Ahmed, Mahmud Beşe b. Hüseyin ve gayruhum.
|