Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 511 Hüküm no: 627 Orijinal metin no: [121b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Endülüs ahalisinden İstanbul’a yerleşen Ali ve kardeşi İbrahim’in Tunus’ta olan akrabalarını getirmek için izin talebi Ma‘rûz. Sâhib-i arzuhâl Ali karındaşı İbrahim ve sâir evlâd ve ezvâc ve akrabâsından on dört nefer ve üç nefer hizmetkârları İslâm arzûsuyla diyâr-ı Endülüs’den bir buçuk seneden mukaddem Mahmiye-i İstanbul’a dâhil ve her biri şeref-i İslâmla müşerref ve ricâli sünnet ve el-Hâc Bayram Kaftanî Mahallesi’nde mutavattın ve emlâk edinip ni‘am-ı pâdişâhî ile mütena‘im ve her biri salâh-ı hâl ile meşgūl mütedeyyin ve mustakīm ve ta‘allüm-i Kur’ân-ı Kerîm etmeleriyle kat‘â kendilerinden nesne sû-i zan olunmaz deyü mahalle-i mezbûre imâmı Mehmed Efendi ve Müezzin Ali Halîfe ve ahâlîsinden memdûhü’l-figāl [memdûhü’l-fi‘âl] el-Hâc Abdurrahman Ağa ve es-Seyyid Mehmed Ağa ve es-Seyyid Halil Ağa ve İsmail Ağa ve Şeyhülkurrâ Mehmed Efendi ve Mühürdâr Mustafa Çelebi ve Mehmed Ağa ve es-Seyyid Mustafa Çelebi ve Ahmed Ağa ve es-Seyyid Abdürrahim Ağa ve es-Seyyid Ahmed ve Mehmed Bey ve Hüseyin Beşe ve diğer Hüseyin nâm kimesnelerden her biri hüsn-i hâllerini ba‘de’l-ihbâr zikrolunan Endülüs’den akrabâ ve aşîretlerinden bir mikdâr kimesneler dahi hurûc ve Tunus diyârında sâkin olduklarını istimâ‘ etmeleriyle mezbûrûndan ancak dokuz nefer ricâl ve nisâdan kimesneler mezbûrûnu ahz ve Mahmiye-i mezbûreye getirmek için mârru’z-zikr Tunus diyârına varıp gelinceye değin mürûr u ubûrlarına mümâna‘at olunmamak bâbında emr-i âlî ihsân ve âtıfet ricâsında oldukları kıbel-i şer‘den irsâl olunan başkâtibimiz Mustafa Efendi dâ‘îleri vârid olan fermân-ı âlîlerine imtisâlen mahallinde tahrîr ve tefahhus ve ma‘an irsâl olunan ümenâ-i şer‘le meclis-i şer‘a gelip inhâ eylediği huzûr-ı âlîlerine i‘lâm olundu. Fî 13 Cumâdelâhire sene [1]143.