Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 512 Hüküm no: 628 Orijinal metin no: [122a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin Rıdvan Halîfe Vakfı’na borcu olmadığını şahitlerle ispatladığı Ma‘rûz. Rıdvan Halîfe Vakfı mütevellîsi sâhib-i arzuhâl Mahmud vakf-ı mezbûrdan beher şehr kırk beşer akçe icâre ile iki bâb menzile bi’l-icâreteyn mutasarrıf olan derûn-ı arzuhâlde mezkûrü’l-ism İbrahim Beşe muvâcehesinde menzileyn-i mezbûreynin icâresinden bin yüz kırk bir senesi Ramazan-ı şerîfinden [bin yüz] kırk iki senesi Ramazanı’na gelince müctemi‘an dokuz guruş icâre bâkī kalmağla bi’t-tevliye taleb ederim deyü da‘vâ eyledikde ol dahi icâre-i mezkûreyi târih-i i‘lâm şehri evâiline gelince müdde‘î-i mezbûra tamamen def‘ ve teslîm eyledim deyü def‘ ve def‘-i mezkûrunu şâhidîn-i âdilîn ile müdde‘î-i mezbûr muvâcehesinde vech-i şer‘î üzere isbât etmeğin mûcebince müdde‘î-i mezbûr bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 14 Cumâdelâhire sene [1]143.