Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 514 Hüküm no: 632 Orijinal metin no: [122a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Buğday döğücü esnafının kendi kileleri ile ölçüm yapmalarına izin verilmesi Ma‘rûz. Ashâb-ı arzuhâl hınta döğücü tâifesinin kethüdâları Mustafa ve yiğitbaşıları Ömer ve erbâbından cemm-i gafîr meclis-i şer‘de kadîmü’l-eyyâmdan her birimiz birer mikdâr buğday almak murâd eylediğimizde hâlisü’l-ayâr tammü’l-vezn kendi kilemiz ile alıp ekmekçi tâifesi gibi Kapan-ı dakīk’den ücret-i gāliye ile kile alıp onunla ölçmek bize ve sâir ibâdullâha gadr olmağın kapan-ı dakīk ahâlîsinden iki nefer kimesneler bilâ-sened mücerred tama‘-ı hâmlarından nâşî celb-i mâl için her birimize ve sâir ibâdullâha gadretmeleriyle hakîkat-ı hâl navluncu ve arpacı tâifesinden ve sâir ehl-i vukūfdan tehaffus olunup haberleri tahrîr ve der-i devlet-medâra i‘lâm ve bî-vech te‘addîleri men‘ ve def‘ olunmak matlûbumuzdur dediklerinde zikrolunan navluncu tâifesinden Ali Bey b. Ahmed ve el-Hâc Mehmed b. el-Hâc Ali ve arpacılar kethüdâsı İbrahim Çelebi b. Mehmed ve Davud Bey b. Ahmed ve Osman b. Mustafa ve İsmail Beşe b. Receb nâm kimesneler fi’l-vâki‘ ashâb-ı arzuhâl kadîmden berü birer mikdâr buğday aldıklarında sahîhü’l-ayâr tammü’l-vezn kendi [122b] kileleriyle alıp ekmekçi tâifesi gibi ücret ile kapandan kile almak mezbûrûna ve sâir ibâdullâha muzırdır deyü her biri ba‘de’l-ihbâr hakīkat-ı hâlî tefahhus için cânib-i şer‘den irsâl olunan Mevlânâ Mustafa Efendi dâ‘îleri Kapan-ı dakīk’e varıp kapan-ı mezkûr kâtibi Abdullah Efendi ve mârru’z-zikr navluncu tâifesinden el-Hâc Osman b. el-Hâc Süleyman ve İbrahim Çelebi b. el-Hâc Mehmed ve el-Hâc Mehmed b. Veli ve el-Hâc Ali b. Mehmed ve el-Hâc Ali b. Abdullah ve el-Hâc Mustafa b. el-Hâc Halil ve Mehmed Ağa b. Murad ve Hasan Beşe b. Musa ve el-Hâc Osman b. el-Hâc Süleyman ve sâir mazbûtü’l-esâmî on altı nefer Müslimînden tefahhus eylediğinde fi’l-hakīka ashâb-ı arzuhâl kadîmü’l-eyyâmdan berü hınta iştirâ ettiklerinde sahîhü’l-ayâr tammü’l-vezn kendi kileleriyle alıp ekmekçi tâifesi misillü Kapan-ı dakīk’den ücret ile kile almak kendilere ve sâir ibâdullâha gadrdır deyü her biri ihbâr ettiklerini mahallinde tahrîr ve ma‘an irsâl olunan ümenâ-i şer‘le meclis-i şer‘a gelip ba‘de’l-inhâ ashâb-ı arzuhâl ber-vech-i muharrer kadîmî üzere kendi kileleri ile ölçüp Kapan-ı dakīk kilecileri tarafından ücret-i gāliye ile rencîde ve te‘addî olunmamak bâbında emr-i âlî iltimâs eyledikleri huzûr-ı âlîlerine i‘lâm olundu. Fî 14 Cumâdelâhire sene [1]143.