Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 515 Hüküm no: 633 Orijinal metin no: [122b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçekapı haricindeki odun çekilerinin kadimden beri Bahçekapısı miftahçılarının zaptında olduğu Ma‘rûz. Mahrûse-i İstanbul’da vâki‘ Bahçekapısı miftâhçısı sâhib-i arzuhâl Mustafa Beşe mahrûse-i mezbûrede bi’l-cümle at hamalları tâifesinin bâ-berât-ı âlîşân başkethüdâları olan Süleyman nâm kimesne mahzarında derûn-ı arzuhâlde tafsîl ü beyân olunduğu vech üzere bâb-ı mezbûr hâricinde vezn olunan hatab çekileri kadîmden berü bâb-ı mezbûr miftâhçıları zabt edegelip zikrolunan çekilere ecânibden bir türlü dahl ü ta‘arruz olunmak îcâb etmez iken ahd-i karîbden berü hilâf-ı kadîm ve mugāyir-i defter-i hazîne-i âmire zikrolunan çekilere gâh Kireçkapısı bostancıları ve gâh İstanbul ağası çorbacıları ve gâh mezbûr at hamallar kethüdâsı bi-gayr-ı vech dahl u ta‘arruz ederler deyü teşekkî ve bâb-ı mezbûrun dâhil ve hâricinde sâkin müseccelü’l-esâmî on dört nefer bî-garaz Müslimîn dahi mârru’z-zikr çekileri kadîmü’l-eyyâmdan berü bâb miftâhçıları zabt edegelip âhardan kimesnenin bir türlü medhali olmadığını ve zikrolunan çekiler derkenârda zikrolunduğu vech üzere ber-mu‘tâd-ı kadîm miftâhçılar zabtında olmak cemî‘ ibâdullâha nâfi‘ ve hayr-ı mahz idiğini mezbûr Kethüdâ Süleyman muvâcehesinde her biri ihbâr ettiklerinde mezbûr Süleyman Kethüdâ dahi min-ba‘d zikrolunan çekilere bî-vech müdâhale ve mu‘âraza etmemek üzere ta‘ahhüd etmeğin ber-vech-i muharrer zikrolunan çekilere hilâf-ı kadîm ecânibden bir türlü dahl ü ta‘arruz olunmamak bâbında müekked fermân-ı âlîşân ricâsında oldukları bi’l-iltimâs huzûr-ı âlîlerine i‘lâm olundu. Fermân hazret-i veliyyü’l-emrindir. Fî 15 Cumâdelâhire sene [1]143.