Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 515 Hüküm no: 634 Orijinal metin no: [122b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avarız malından zimmet davasının meşru olmadığı Ma‘rûz. Sâhib-i arzuhâl Süleyman meclis-i şer‘de sâbıkā Zihne kādısı Mehmed Efendi mahzarında kazâ-i mezkûr re‘âyâsı üzerlerine bâ-fermân-ı âlî edâsı lâzım gelen mâl-ı avârızlarından mezbûr Mehmed Efendi bi-gayr-ı hakkın kırk dört bin beş yüz elli akçe ahz u kabz etmekle mezbûr Mehmed Efendi’den taleb ve da‘vâsı meşrû‘a olmayıp re‘âyâdan lâzım gelmeğin bî-vech mu‘ârazadan mezbûr Süleyman ba‘de’l-men‘ mezbûr Süleyman kādı-ı mezbûrun emriyle kethüdâsı Ahmed’e kendi mâlımdan iki yüz on dokuz buçuk guruş def‘ ve teslîm etmemle emr-i mezkûruna binâen taleb ederim deyü ba‘de’d-da‘vâ ve’l-inkâr mezbûr Süleyman müdde‘âsını isbâtdan izhâr-ı acz ile istihlâf etmeğin mezbûr Kādı Mehmed Efendi tahlîf-i şer‘î ile tahlîf olunup mezbûr Süleyman bilâ-beyyine bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 17 Cemâziyelâhir sene [1]143.