Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 516 Hüküm no: 637 Orijinal metin no: [123a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Güzelkebir köyündeki câminin tevliyeti konusunda açılan davanın meşru olmadığı İ‘lâm madrûbda galat olmağla üç i‘lâm aşağı musahhahen kaydolunmuşdur. < Medîne-i Karahisâr-ı şarkī sükkânından ( ) medîne-i mezbûrede Güzelkebir nâm karyede vâki‘ merhûm Ebu’l-feth Sultan Mehmed Hân binâ eylediği câmi‘-i şerîfin yevmî iki akçe vazîfe ile mütevellîsi es-Seyyid Ahmed ile ba‘de’t-terâfu‘ tevliyet-i mezbûreye bundan akdem babam müteveffâ Musa mutasarrıf olmuş idi deyü tevliyet-i mezkûreyi da‘vâ eylediğinde mezbûr es-Seyyid Ahmed’in yedinde olan berât-ı âlîye nazar olundukda mukaddemâ mezbûr Musa mütevellî iken ahâlînin teşekkî[si] ile medîne-i mezbûre kādısı arzı ve Seyyid Musa ref‘inden mezbûr es-Seyyid Ahmed’in baba[sı] es-Seyyid Mehmed’e tevcîh buyrulup ba‘dehû es-Seyyid Mehmed dahi oğlu mezbûr es-Seyyid Ahmed’e kasr-ı yed ve hâlâ mezbûr es-Seyyid Ahmed tecdîd-i berât edip ve müdde‘înin tevliyet-i mezkûre da‘vâsı meşrû‘ olmadığından mâ‘adâ hâlâ medîne-i mezbûr kādısı es-Seyyid Ahmed’in istihkākını ve müdde‘înin adem-i istihkākını arz etmekle müdde‘î-i mezbûr bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 17 Cumâdelâhire sene [1]143>>